Mizoram aiawhin boxer pali

Mizoram Boxing Association (MIZBA) chuan 4th Elite (Senior) Men's National Boxing Championship hmachhawn turin Mizo boxer pali Laldingliana (57 kg), Vanlalawmpuia (63 kg), Zochhuanawma Fanai (69 kg) leh H. Lalrinhlua (81 kg) te an tir.

Mizoram aiawh turte hian Inrinni khan coach Lalfakzuala leh manager Lalhmingmawia Ralte (Jt. Secretary, MIZBA) hoin Aizawl an chhuahsan. Inelna hi Baddi, Himachal Pradesh-ah October 4-10 hian neih a ni ang. Tuipui tlangval Laldingliana hi SAI-a inzir mek a ni a; 57 kg category-a tel tur All India Inter SAI leh North-East Games-ah te gold a la tawh a, LPS Pro-Fight-ah belt holder a ni bawk.

Boxer dang pathum AwP-a, Zochhuana leh Rinhlua te hi Sete Boxing Academy-a inzir mek an ni thung. Khuangthing tlangval AwP-a hian 1st North-East Olympic Games 2018 gold medal a la a, Republic Veng tlangval Zochhuana hian N.E. Olympic 2018-ah bronze medal lain Hnahthial tlangval Rinhlua hi national (sub junior 2013) leh NE Games 2018-ah bronze  medal a la.

Boxer palite hian Mizoram chhungah record ṭha tak an nei a, National level-ah erawh hming an la chher tawk lo. Mizoram boxing tan Men's National Boxing Championship-a chet ṭhat hi a pawimawh khawp ang.