Lewandowski chhing zo an awm lo

Robert Lewandowski chu Bundesliga player awm tawh zingah league match hmasa paruk aṭanga goal 10 khung tleing thei hmasa ber a ni. Poland international hian Paderborn lakah goal khat khungin Bavarians hi 3-2 in a chakpui.

Inrinni zan inkhel dangah Borussia Dortmund an che fuh tawk lo, chak turin hun ṭha nei mah se an goal an venhim loh avangin Werder Bremen nen 2-2 in an inhnehtawk.

Benteler Arena-a inkhelah Bayern-in Serge Gnabry leh Phillipe Coutinho te goal hmangin 2-0 in hma an hruai, kai thar team tan Kai Proger chuan sut ṭhen ve mah se Lewandowski-a'n chak nemnghehna goal a khung. Hun tawp dawna Jamilu Collins goal khungin awmzia a nei lo.

Bayern munich striker Lewy hian tun season league match parukah goal a la khung vek a, a pumpuiah goal 10 a nei tawh. Hetiang zat goal khung tura hun mamawh rei lo ber a ni a, goal khung zawn rei lamah erawh el tur a la nei.

Kum 2016 khan Pierre-Emerick Aubameyang chuan season tir lam match riat chhung goal a lo khung zawn tawh, hemi ṭum hian match riatah goal 10 a khung. Gabon international record tluk turin Lewy tan match hnih a la ngai dawn.

Niko Kovac-a naute hian point 14 hmuin league hmahruaitu an ni ta a, inkhel dangah an elpui RB Leipzig chu an mikhual Schalke lakah 3-1 a an tlawm avangin Bayern hian lehpelin table chung berah an awm.

Borussia Dortmund-in pahnihna nih theihna hun ṭha an nei a, mahse an bawhpelh. Signal Iduna Park-a inkhelah Bremen lamin Milot Rashica hmanga an hmahruaina chu Mario Gotze leh Marco Reus te hmangin an chhang let - chawlhlawk laiin 2-1 in hma an hruai.

Dortmund tlarhnung a phui tawk lo, second half minute 55-naah Marco Friedl chuan Bremen point hlawhchhuah theih nan goal a khung a, goal dang a luh belh tawh loh avangin point khat ve ve insema an lungawi a ṭul.

Jadon Sancho a hmuhnawm lehpek a, league match hmasa panga aṭangin goal thum bakah assist vawi nga nei thei hi a vanneih ṭum a ni bik lo thung. Goal khung tura a hun ṭha neih chu keeper Jiri Pavlenka-a'n ṭha zetin vawi hnih a dansak.

Lucien Favre-a enkawl Dortmund hian beiseina sang tak nen season bul ṭan mah se an che ṭha tawk lo. Point 11 chauh an la neih avangin table-ah pasarihna an ni a, chutihrualin hmahruaitu Bayern an phak lohna chu point thum chauh a la ni.