PSG chakna chu Neymar bawk

Neymar chuan sawiselna karah pawh Paris St-Germain mamawh chhanna a nihzia a lantir chhunzawm zel. Inrinni zan khan Brazil international hian Bordeaux lakah goal pawimawh khungin a club hi 1-0 in hnehna a chanpui.

Ligue 1 champion PSG hi an match hnuhnung zawkah Reims an ngam lo a, tun ṭumah pawh hian goal khung an harsat. Hliam dam hlim Kylian Mbappe luh chinah erawh boruak a danglam. France international hian khelmuala a luh aṭanga minute 10 hnuah Neymar (70') goal khung tur a siamsak.

Nipui bazar laia Barcelona lama let tura ngaih Neymar hi tun hma angin Paris khawpuiah lawm a hlawh tawk tawh lo. Mahse, tun hnai an legaue match vawi liah vawi thum an chakna goal chu a khung vek a ni a, fans lam tan huat reng theih a ni lo ang.

Kum 27 mi Neymar chuan, "He hmunah hian Paris Saint-Germain tana khel turin ka awm a, boruak hrang hrang leng vel karah lawmna tur thu a rawn awm leh ṭhin," a ti. Paris club nena an chanchin chu ngaihzawng nena boruak chhiat chang nei, mahse chhe hlen thei si lo nen a tehkhin bawk.

Thomas Tuchel-a naute hian Ligue 1 match riat aṭangin point 18 an hmu a, table hmahruaitu an ni - an hnuai chiahah hian point 16 hmutu Angers leh Nantes an awm mek.