100m intlansiak pakhatna Christian Coleman

World Athletics Championships 2019 neih meka mipa 100m intlansiakah Christian Coleman chu pakhatna a ni a, gold medal dawng tur hian 9.76 seconds chhungin a tlan thleng a ni.

American tlangval Coleman hi inelna neih hma khan doping test vawi thum a inlan loh avangin hrem tura ngaih a ni. Mahse, hremna hmu loin inelna a hmachhawn thei hlauh a, a hnampui leh champion tura rinkai pakhat zawk Justin Gatlin (9.89) hnehin a chungnung ber.

Qatar khawpui Doha-a inelna neihah hian Canada tlangval Andre de Grasse chuan second 9.90 chhunga thlengin bronze medal a dawng ve bawk. Kum 23 mi Coleman chuan, "He hmunah hian hnehna chan tumin ka kal a, ka duh leh beisei ang ngeiin ropuina ka chang. Hmasawnna tur erawh ka la ngah," a ti a, a thlen chinah duhtawk mai a tum lo.

Mipa 100m intlansiaka record nei ṭha ber chu Usain Bolt a la ni reng. Jamaican sprinter ropui hian German khawpui Berlin-a World Championships an neih ṭum khan 9.58 second chhung lekin a thleng a, tun thlengin elphak an la awm lo a ni.