Liverpool an kal zel; City-in an um

Premier League-ah Liverpool chelh thei an la awm lo a, match sarih an khelha an vawi sarih chakna ni turin Sheffield United chu 1-0 in khualmualah an hneh. 

Manchester City-in Liverpool thlah fal lutuk an duh lo a, khualmualah Everton chu 3-1 a sawpin Jurgen Klopp enkawl team an zui ve zel. Chelsea boss Frank Lampard-a'n Stamford Bridge-ah a vawi khat nan league-ah a team a chakpui a, Brighton & Hove Albion chu 2-0 in an hneh. 

Tottenham-in inelna hrang hranga an match hnuhnung pathumah hnehna an chan zawh loh hnuin an chak ve leh ta a, an mikhual Southampton chu 2-1 in an ngam. 

Premier League kai thar Sheffield khelmualah Liverpool an vannei tih ṭawngkam hman a ṭul a, Jurgen Klopp naute hian ṭum danga an khelh dan an phak lo. 

Reds goal khung awmchhun hi minute 70-naa Georginio Wijnaldum khung a ni a, Dutch midfielder hma zawng hian Liverpool-in target-ah shot an nei miah lo! Wijnaldum goal khung pawh hi vanneih vang tiin a la sawi theih hram - shot naran tak nia lang chu Blades (Sheffield sawina) goalkeeper Dean Henderson chuan awlsam taka man a tum a, chesualin a kap karah a lut. 

Bench aṭanga luhtir Leon Clarke chuan Sheffield tan si phurh sutna remchang nei mah se a chhawr lo a, kum 34 mi forward-in Premier League a khelh hmasak ber a ni. 

Liverpool boss Jurgen Klopp-a'n vanneiah a inngai lo a, chak an phu thu a sawi. German coach chuan, "Point hlawh chhuak tur chuan khawi hmunah pawh thawhrim a ngai. 

"0-0 khan inkhel tawp ta se, a awm lo hran lo ang. Chutihrual chuan hnehna chan phu zawk an awm a nih chuan keini hi kan ni. Vannei takin goal kan khung a ni mai thei a, mahse kan thawkrim em em a ni," a ti. Liverpool tan Sadio Mane chuan a hun ṭha a hlah a, Mohamed Salah chuan goalkeeper chauh a hmachhawn tawh chungin an khung lo bawk. 

Sheffield hian inkhel ṭantir lamah chance an nei ve tho a, mahse Ollie McBurnie-a shot chu Adrian chuan a dansak. 

City tan Gabriel Jesus-a'n minute 24-naah goal hmahruai a khung a, Everton-in minute 33-naah Dominic Calvert-Lewin hmangin an sut ve nghal. 

Mahse, team ṭha zawk nihna inkhel chawhnu lamah a lang chhuak a, minute 20 hnu lamah Riyad Mahrez leh Raheem Sterling-ten khungin City an chak. Mahrez-a freekick chu goal mawi bik a ni. City hian an chak chhanah goalkeeper Ederson fak tel an mamawh - Brazilian keeper hian Calvert-Lewin leh Yerry Mina khung ngei tur nia lang chu ṭha takin a dan sak a, City a chhanhim. 

Man City boss Pep Guardiola chuan, "Goodison Park-ah inkhelh a awlsam ngai lo. Mahse, ṭha taka bul ṭanin chance kan insiam a, goal kan khung bawk," a ti. 

Blues-in mikhual Brighton lakah chak turin harsatna an tawk lo a, Jorginho (penalty) leh Willian goal khung hmangin an mikhual hi 2-0 in an lo hneh.

Lampard tan Stamford Bridge-a Premier League match a chak hmasak ber a ni a, shot 24 ngawt an neih avangin hei aia tam zawk goal khung pawh an phu. Blues manager Lampard chuan, "Hetiang taka minute 90 chhung ro rel hi kan nei mang lo. Kha aia tam zawk kha goal khung thei kan ni a, chu chiah chu kan tih fuh tawk loh lai a ni. Mahse, goal kan chhuah lo a, kan vai inrintawkna atan result duhawm tak a ni," a ti. 

Chelsea hian Brighton hi league match kua an hmachhawn tawhah an la hneh vek a, English top flight league inhmachhawna 100% inhneh record ṭha ber a ni. 

Tottenham tan pound maktaduai 53.8 man Tanguy Ndombele chuan minute 24-naah goal hmahruai a khung a, Spurs hian awlsam takin Southampton an hneh dawn niin a lang. 

Mahse, Serge Aurier chu minute 31-naa a yellow card pahnihna avangin hnawhchhuah a ni a, Hugo Lloris chetsual vangin Danny Ings chuan minute 39-naah si phurh a sut zui. Lloris hian goal hnaihah Ings hi 'bum' a tum a, mahse a ball thai ṭhelh chu Liverpool striker hlui hian nang fuhin goal-ah a chantir - Harry Kane chuan first half tawp hma hretin a rawn khung leh a, French keeper mualphona a rawn hliahkhuh. 

Spurs manager Maurcio Pochettino chuan, "Hugo hi dem theih a ni lo. Khatianga khel tur khan ka hrilh avangin a ti a ni mai a, in sawisel dawn a nih chuan keimah hi sawisel tur ka ni ang," tiin a keeper a chhan.