SAFF U18-ah India champion

South Asian Football Federation Under 18 Championship final-ah India chuan 2-1 in Bangladesh an hneh a, a vawi khatna atan an champion.

Kathmandu khawpuia inkhelah India U18 tan hian Vikram Pratap Singh chuan minute hnihna lekah goal hmahruai a khung a, Bangladesh tlarhnung lam khawng tawk loh a puh theih. 

Inkhel boruak a 'hot' a, minute 23-naah Vikram laka foul avangin buaina tenau a chhuak. India goal hmahruai assist tu Gurkirat Singh chu a yellow card pahnihna pek a ni a, Bangladesh player Md. Fahim nen hnawhchhuah an ni. 

Mahse, Bangladesh an beidawng lo. Minute 38-naah Yeasin si phurh a sut - mahse an kim lo zui! Yeasin hian yellow card a lo hmu tawh a, he mi ngaihtuah miah lo hian kawr phelh chungin a goal khung a lawm - a yellow card pahnihna pek a ni a, hnawhchhuah a ni. 

India-in a tam zawk nih an chhawr lawk thei lo, injury time-ah corner aṭanga ball kal zel chu Ravi Bahadur Rana chuan penalty box pawn aṭangin kawh zetin a pet a, Bangladesh keeper tan dan theih a ni lo. India coach Floyd Pinto chuan, "Kan champion hi kan lawm takzet a, player-te hian champion an phu a, an thawh chhuah a ni," a ti.

Blue Tigers tan Mizo tlangval Lalbiakhlua Jongte chuan si ban nghakin inkhel bul a ṭan a, midfielder pahnih Lalrampana Pautu leh Vanlalruatfela Thlacheu chu squad-ah an tel bawk. He team hi AFC Under 19 Qualifier khel tura inbuatsaih mek an ni a, "He result hian inrintawkna min pek ngei ka beisei," tiin Pinto chuan a sawi. India hi August-ah khan SAFF Cup U 15-ah an champion tawh bawk a ni.