Chennaiyin khelmualah Jamshedpur

Indian Super League chu zanin dar 7:30-ah khelh chhunzawm a ni dawn a, Chennaiyin FC chuan Jamshedpur FC an mikhual dawn. 

Chennaiyin hian John Gregory hnuaia beisei an phak loh hnuah Blackburn Rovers boss hlui Owen Coyle an lalut a, table mawngphah lama hun tam zawk hmang khan playoff khelh an sawi ve leh ta. 

Jamshedpur hi table-ah 12-na niin Chennaiyin chung chiahah an awm a, point khat lekin an sang zawk. Panganaa awm Mumbai City hian point 19  nei mah se Chennai club leh JFC aiin match khatin an khel tam zawk. 

Chennaiyin leh Jamshedpur tan top four hnaiha inchhawp turin chak ngei ngei a ngai tihna a ni a, Jawaharlal Nehru Stadium-ah inkhel hmuhnawm a beisei ngam. 

Jamshedpur hian Mizo pakhat Isaac Vanmalsawma an kawl a, Hnahthial midfielder hian match sarih a khelhsakah goal khat a khung tawh. 

Chennaiyin erawh ISL-a Mizo player kawl hnem ber an ni a, Jerry Lalrinzuala, Laldinliana Renthlei, Zohmingliana Ralte, Lallianzuala Chhangte leh Jeje Lalpekhlua an nei. 

India international Jeje hian tun season-ah hliam vangin match khelh a la nei lo.