Manchester United 9 - 0 Southampton Solskjaer-a hoten Premier League record nih rual

Premier League-a insawp ber record chu 9-0 a ni a, Ole Gunnar Solskjaer hoten Thawhlehni zan khan Southampton 9-0 a sawpin he record hi an nihrual. Manchester United-in point 44 hmuin league table-ah hmahruaitu Manchester City nen an point hmuh zat a inang a, nizan khan Pep Guardiola hote an inkhelh avangin an point dinhmun hi a la danglam thei thung.

Old Trafford-ah substitute Anthony Martial-a'n goal hnih a khung a, Aaron Wan-Bissaka, Marcus Rashford, Edinson Cavani, Scott McTominay, Bruno Fernandes leh Daniel James ten goal khat ṭheuh an khung bakah Saints defender Jan Bednarek-a'n an lamah a ti lut. 

Southampton-in an rawlthar Alexandre Jankewitz bul an ṭantir a, Saints academy aṭanga inzir chhuak Swiss defender Jankewitz hian minute hnih pawh tling loah ṭul lo takin Scott McTominay a tlawh.

Referee Mike Dean-a'n thil thleng a hmu chiang si a, second 79-na lekah red card phawrh mai lo tih chu tih theih dang a nei lo. Saints manager Ralph Hasenhuttl-a'n player inhliam a ngah sa avangin an ṭhat dan berin player a rem tawh lo a, bench-ah inkhel thlak danglam tur player a kawl tawh lo.

Man United-in player 10-a khel Saints lakah zahngaihna an lantir lo a, goal ruk an khung. Minute 86-naah Jan Bednarek-a'n Martial ti tluin penalty a chawi a, hnawhchhuah a ni bawk. Hemi hnu hian mualneitu hian goal thum an khung belh.

Bednarek-a'n an lamah a ti lut a, penalty a chawi a, hnawhchhuah a ni a, goal kua an chhuah zan hi a teammate-te ang thoin theihngilh a duh ang.

Saints-in chhuanlam an nei a ni thei a, chutihrualin Man United khelh ṭhat zia erawh zep rual a ni lo. Ṭan phat aṭangin Man United an nung ṭha a, player zawng zawng an thawkrim vek.

Uruguayan forward Cavani-a'n ball ṭha hmuh tumin ball a zawng reng a, United-in an nawr tawm vek avangin defence leh goal inkar zau lai ti zim turin keeper David de Gea a rawn chhuak thui bawk.

Minute 10 chhungin chance ṭha bik a awm lo a, minute 18-naah Luke Shaw-a ball cross chu ven uluk loh ber Wan-Bissaka-a'n a pet goal. Minute 25-naa Mason Greenwood-a cross Rashford-a khung chu goal ṭha a ni a, minute 34-naah Bednarek-a'n an lamah a ti lut. Saints defender hian Rashford cross hi ti lut lo mah se a hnunga awm Fred-a'n a khung tho dawn.

Minute 39-naah Shaw-a cross duhthusam chu Cavani-a'n a tauh goal a, first half hmain Uruguayan forward hian penalty hlawh chhuakah inngai mah se VAR hmanga ennawn a nih hnuah freekick a ni ta zawk. Fernandes-a'n goal-ah a chantir theih loh avangin halftime-ah 4-0 a ni.

United an chak chiang tawh a, Cavani leh Shaw te hahdamna hun pein an aiah Donny Van de Beek leh Martial te an lut nghal. Solskjaer-a naute game a dul hret a, freekick hmang ṭangkaiin Saints forward Che Adams-a'n a pet lut. VAR aṭangin an en let a, mak takin goal hi pawm a ni lo. Replay en let ngial hnua thutlukna awm thei chu Saints an vanduai tih zawng a ni.

Goal pawm loh hian United a beng harh a, Fernandes-a ball fing tak chu Martial-a'n minute 69-naah ṭha zetin a khung. Minute hnih hnuah Scott McTominay-a'n box pawn aṭangin kawh zetin a volley goal a, goal kua zinga pakhat chauh ni loin goal awm chhun ni se chuan sawi vul chuk tham a tling.

Minute 87-naah Bednarek chuan Martial tih tluk vangin penalty a chawi a, VAR hmanga en let fe hnuah hnawhchhuah a ni. VAR-in Saints mualphona a belhchhah a, Fernandes-a'n penalty aṭangin a khung leh ta. Minute 90-naah Martial-a'n ṭha takin a pet goal a, French forward hian a chance neih hmasak khung bawk se hattrick siam thei tur a ni.

Injury time-ah substitute Daniel James-a'n midfielder fing Fernandes nen an inthlawp hnuah cool takin goal kuana a khung a, Man United 9-0 in an chak.

Manchester United manager Solskjaer chuan, "Player pakhata an tlem tawh kha chuan goal hmasa ber khung ran kha kan tih tur chu a ni. Inkhel harsa emaw awlsam emaw pawh ni se hun ṭha hman ṭangkai hi a pawimawh a, goal khung tam a pawimawh. Goal difference vangin tun hmain kan champion lo tawh a, danglamna thlentu a la ni thei a ni," tiin a sawi.

Premier League-ah hian goal difference en a ni a, 2011-12 season khan Manchester United hian an hmelma Manchester City chu goal difference-a an tluk loh avangin nomawi an chan.

Southampton manager Ralph Hasenhuttl chuan, "Minute thum leka a tlem zawk nih chuan a harsa. Manchester United ka lawmpui a, an thawkrim a, an pet goal reng mai a ni. Red card pahnihna kha pawm thiam a har a, player kan nei tawh lo," tiin inhliam leh hrem vangin an hmabak a harsat phah tur thu a sawi.

Hasenhuttl chuan sawi chhunzawmin, "Second half-ah clean sheet kan tum a, mahse player pakuaa kan khelh kha chuan an tan goal khung a awlsam tawh em a ni. Kan tan mangchhia a ni a, chutihrualin Leicester nen 9-0 a kan chak loh hnuah kan tho chhuak. Tun ṭumah pawh kan tih leh a ngai dawn a ni," tiin a sawi.

Manchester United hian February 6 zan dar 1:30-ah Everton an mikhual ang a, Southampton pawhin Inrinni zan dar 8:30-ah Newcastle United an tlawh ang.

Mancheser United-in March 4, 1995 khan Old Trafford-ah Ipswich Town 9-0 in an sawp a, Premier League-a insawp ber record a ni. United tan hian Andy Cole-a'n goal nga khungin Mark Hughes-a'n goal hnih a khung a, Roy Keane leh Paul Ince ten goal khat ve ve an khung.

October 25, 2019 khan Leicester City-in Man United record hi an nihrual a, St Mary's Stadium-ah Southampton 9-0 bawkin an sawp. Foxes tan hian Jamie Vardy leh Ayoze Perez ten hattrick an siam a, Ben Chilwell, Youri Tielemans leh Maddison ten goal khat ṭheuh an khung bawk.

Ole Gunnar Solskjaer-a'n a pu hlui Sir Alex Ferguson-a record a rawn nih rual ve leh a, Norwegian manager tan tun ṭuma Southampton an hneh hi chanchin chhinchhiahtlak a ni ang. Saints an sawp ṭum hian player hrang vek pasarihin goal an khung.

December 2012 khan Chelsea-in Aston Villa 8-0 in an sawp a, hemi ṭum hian Blues tan player hrang vek pasarih goal na khung. London club hnua match khata player hrang vek pasarih goal khung leh thei hmasa ber chu Manchester United an ni.

Southampton laka goal khungtu Marcus Rashford chuan Manchester United tan goal 83 a khung a, club legend Eric Cantona record a khum. 

United captain hlui Cantona khan 1993 leh 1997 inkarah Man United tan goal 82 a khung a, French forward-in United kawr a hak hnuhnung ber aṭanga thla nganaah (October 1997) Rashford hi a piang ve chauh a ni.

Wayne Rooney    253

Ryan Giggs    160

Paul Scholes    155

Ruud van Nistelrooy    150

Ole Gunnar Solskjaer    126

Andy Cole    121

Cristiano Ronaldo    118

David Beckham    85

Marcus Rashford    83

Eric Cantona    82