Mourinho hmaah Tuchel-a Chelsea fiahna

Zanin dar 1:30 hian point 33 hmu tawh Tottenham Hotspur-in an point hmuh zat hmu leh an hnuai chiaha awm Chelsea an mikhual dawn. Tun hnaia Jose Mourinho kaihhruai Spurs chet ṭhat loh avang te leh Blues manager thar Thomas Tuchel avang te leh manager pahnih an vawi khat inhmachhawnna tur a nih avang tein zanin inkhel tur hi a nghahhlelhawm hle.

Tottenham-in striker chhuanvawr Harry Kane hliam vanga an chawr theih loh bakah an match hnuhnung pahnihah Liverpool leh Brighton an hneh lo. Chelsea erawh manager Tuchel-a hnuaiah Wolves nen an inhnehtawk hnuah Burnley 2-0 in an hneh a, Spurs hi fiahna hmasa berah a ngaih theih.

Tottenham tana Harry Kane awm lo hi a langsar a, player ṭha dang Giovani Lo Celso, Dele Alli leh Sergio Reguilon te hliam vangin an khel thei lo bawk. Brighton an hneh loh ṭumin Davinson Sanchez, Gareth Bale leh Steven Bergwijn te an che ṭha tawk lo a, Chelsea lakah bul an ṭan nawn a rinawm loh. Real Madrid aṭanga loan hmanga an hawh Bale-a'n Kane awm loh vangin bul a ṭan a, a khelh dan vangin bul a ṭan nawn rinawm loh.

South Korean forward Son hi season ṭan tirh lamah a che ṭha fal a, tlarhnung player-te tan mangchhia a ni. Match hnuhnung paliah erawh Son hian goal a khung tawh lo. Harry Kane awm loh vangin Son hi a hlauhawm lo sawtah a ngaih theih a, chutihrualin Carlos Vinicius hming lam rik a ṭul. Brazilian forward Vinicius bul ṭan hnuhnun ber chu FA Cup-a Wycombe 4-1 an sawp ṭum kha a ni a, Kane a awm miau loh avangin Vinicius hian hmun pawimawh a chang thei ang.

Tuchel-a hnuaiah Chelsea-in ball an in pass tam a, Mourinho-a'n goal venhim a pawi ti lo. Midfielder chak ṭha pahnih Pierre-Emile Hojbjerg leh Tanguy Ndombele ten goal nawr lam aiin tlarhnung an ven uluk a ṭul dawn. Chutirhualin Mourinho team an nih miau avangin counter attack hmanga beih let dan tur an duang tel ang.

Chelsea-in manager thar Thomas Tuchel-a hnuaiah ball an chang hnem hle. Wolves nen an inkhelh ṭumin 79% zet ball possession an nei a, Burnley lakah 72% ball an chang leh a, khualmuala khel tur ni mah se Spurs nen pawh ball chang tam zawk an ni ngei ang.

Tuchel hian match hnihah tlarhnung player pali keeper Edouard Mendy, Thiago Silva, Antonio Rudiger leh César Azpilicueta bakah midfield aṭanga tlarhnung puitu Mateo Kovacic leh Jorginho te a hmang nawn vek. Chutihrualin a hma pathum erawh a thlak hlawk thung a, hei hian Blues squad chhahzia a pholan rualin goal khung thei bik player an nei lo tih a pholang.

Olivier Giroud, Tammy Abraham, Mason Mount, Timo Werner, Hakim Ziyech leh Kai Havertz te aṭanga duh thlan hi a awlsam dawn lo. Tuchel-a erawh match hnih an khelh tawh aṭangin player hman thiam zet a nei a, Bayern Munich pawhin lak tuma an hel tawh Callum Hudson Odoi chu right wing back-ah chhawrin mualsirah a hlauhawm hle.

Mourinho pawhin Hudson Odoi che ṭha hi a hmuh hmaih a rinawm lo a, English winger bakah Chelsea hmatawngte a dan chah tum tur chu football ngainatute hmuh châk a ni.