Sheffield-in an elpui Baggies an hneh

Premier League-ah nomawi inchuha club inum chanchin a ngaihnawm tluk zetin tlak hlaua club inum chanchin a ngaihnawm belh zel.

Thawhlehni zan khan table hnuai lam pahnih inkhelah Sheffield United chuan 2-1 in West Bromwich Albion an hneh a, English top flight league-a inhamtan an beiseina an chhit nun chhunzawm. 

Baggies tan Matt Phillips chuan goal hmahruai khung mah se Sheffield-in Jayden Bogle leh Billy Sharp hmangin an chhanglet a, a hnufual hmasa zawk kha a tawpah 2-1 in an chak. 

Sheffield hian hnehna an chan avangin table mawngphah talchhuah san lo mah se an chung chiaha awm Baggies hi khelh zat inangah point khat chauhin an thlau ta a, a him china awm Brighton & Hove Albion erawh point 10-in an la thlau thung. 

Season hmasaa fak hlawh em em Sheffield United-in beisei an phak lo a, kar hmasa lawk thleng kha chuan Premier League mangṭha mai turin fans tam takin an ngai tawh. 

Mahse, an huaisen vanga fak hlawh ṭhin Sheffield hian huaisen zia dik tak an chhuah leh ta a, an league match hnuhnung pathumah vawi hnih hnehna changin vawi khat chiah an tlawm. 

Sheffield hian kar hmasa khan champion beisei leh team kaltluang Manchester United chu 1-0 a hnehin bul an ṭan a, Manchester City lakah 1-0 in tlawm zui mah se Baggies hnehin an insiamṭha leh ta. 

Blades (Sheffield sawina) hian United an hneh hma khan league match 19 an khelhah vawi khat chiah hnehna an chang a, tunah match 22 khelin vawi thum hnehna an chang ve ta - tawh an khirh tawlh tawlh ang.

Sheffield-in an mikhual Baggies lakah an theihna an pholang hleithei lo a, West Brom tlarhnung an khawng ṭhat bawk si avangin minute 45 aṭanga teh chuan Sheffield zawk hi an tlawm leh dawn niin a lang. 

Bramall Lane-a inkhelah hian goal pawh Baggies lamin an khung hmasa zawk a, minute 41-naah Phillips chuan a team tan goal hmahruai a khung - tun season Premier League-a a goal hmasa ber a ni. 

League Two club Wycombe Wanderers aṭanga bul ṭan forward hian English Football League-ah season 13 chhung chu goal-a la khung ziah a, 2008/09 season khan Wycombe tan League Two-ah goal khungin bul a ṭan a ni. 

Baggies tan Phillips-a lansarh laiin Sheffield tan erawh goalkeeper Aaron Ramsdale chu player langsar a ni a, Phillips-a goal hma hian Callum Robinson leh Mbaye Diagne-ten Ramsdale en chhinna hi an nei. 

First half-ah Sheffield-in goal chhuah hmasa mahse chawlhlawk hman hnuah insiamṭhat tumin an khel a, Oliver McBurnie-a lut chuan danglamna a keng tel bawk - mualneitu team kan hmu tam ṭan.

Minute 56-naah Bogle chuan si phurh sutna goal a rawn khung a, Chris Basham siamsak a ni. Player pahnih an inman a, an taima bawk a, hei hian Baggies tlarhnung a ti mangang ṭhin hle. 

Sheffield boss Chris Wilder-a'n player siksawi tumin Sharp lakchhuah a tum a, mahse, kum 34 mi striker hian lakchhuah a la hun lo tih pholangin minute 73-naah an hmahruaina goal a rawn khung. 

Blades hian first half chhung zawngin vawi li chiah shot an nei a, second half-ah erawh vawi 10 shot an nei thung - hei hian Sheffield insiamṭhatna a hrilhfiah a, a tawpa 2-1 result chuan chiang lehzualin min hrilhfiah. 

Sheffield-in hnehna an chang a, Premier League inhamtan an beisei tawh loh chu fan-te pawhin an beisei ve leh ṭan ta. Hetihlai hian coach Wilder erawh fimkhur takin a ṭawng a, hmabak an la ngah thu a sawi. 

English coach chuan, "Insiamṭhat kan mamawh ang ngeiin second half-ah kan insiamṭha a, Baggies ai khan chak kan duh zawk a ni. Hnehna pawimawh tak a ni a, mahse, kawng thui tak zawh turin min la hmuak. 

"Hei vang tak hian phur luatah talbuai loh kan tum a, chona hautak em emin min la hmuak reng a ni. Tun hnaia hnehna kan chan avangin phur luat a thiang lo - Premier League a ni a, chetsual theih a ni," a ti. 

Kum 53 mi coach hian beiseina sang tak erawh neiin, "Player chak duha tui hal, an nunna tura huaisen taka bei ngam kan kawl a ni," tiin a sawi. 

West Brom-in manager Sam Allardyce enkawlna hnuaia Liverpool an hnehtawk khan beiseina sang tak an nei a, Leeds United leh Arsenal-ten sawp zui mah se team ṭha Wolverhampton Wanderers an hneh zui avangin an zam lo. 

Mahse, Wolves an hneh hnuah Baggies hian point 12 hlawhchhuah theih aṭangin point khat chauh an hlawh chhuak a, February 7 zanah Tottenham Hotspur hmachhawnin February 14 zanah Manchester United an mikhual zui dawn bawk!

Big Sam tan hna a hautak dawn tih a chiang a, England coach hlui hi a tumah erawh a chiang thung. Manager tawnhriat nei ṭha Big Sam chuan, "He league-a cham chhunzawm tur hian point engzatnge hmuh ngai kan hria. Midang thiltih kan buapui thei lo a, point 38 hmuh tuma ngaihtuahna kan sen a ṭul," a ti. 

Kum 66 mi coach enkawl Baggies hian match 22-ah point 12 an nei tawh a, league match 16 chiah khelh tur a awm tawh - point 48 hlawhchhuah tur a la awm tihna a ni.