Magpies lakah Palace an 'comeback'

Newcastle United-in minute hnihna lekah Jonjo Shelvey hmangin goal hmahruai khung mah se Crystal Palace-in Jairo Riedewald leh Gary Cahill goal hmangin an chhanglet a, a tawpah 2-1 in hnehna an chang. 

Kum 28 mi Shelvey-a'n minute hnihna lekah Palace ṭhawng mah se Roy Hodgson-a enkawl team hian tlawm an tum lo. Minute 21-na lekah Riedewald chuan si phurh a sut nghal a, yard 20 vela hla aṭanga a pet chuan Magpies defender Ciaran Clark perin goal-ah a lut.

Minute li a liam awrh a, Palace bawkin an khung chhunzawm - kum 35 mi Cahill hian Eberechi Eze corner aṭanga ball kal chu a tauh lut a, Palace tana Premier League-a goal khung thei upa ber record a siam zui. 

Palace tan hun tawp lamah Andros Townsend chuan goal khung belhna remchang nei mah se goal-ah a chantir thei lo a, chance nei ṭha zawk Newcastle tana Ryan Fraser-a hun duhawm chu Palace keeper Vicente Guaita chuan ṭha zetin a dang ve ve.

Kum 34 mi goalkeeper hi Real Sociedad nen sawizawm ni mah se February 1 khan Palace-ah kum 2023 nipui thleng cham turin contract thar a ziak a, contract thar a ziah hnua a match hmasa berah Palace vanneihna pholangin a chakpui nghal. 

St James' Park-a an tlawm avangin Newcastle an him lo a, table-ah 16-na an ni mek - an hnuai chiaha awm Brighton & Hove Albion aia an sanna hi point khat lek a ni a, match khatin an khel tam bawk. Nizan khan Brighton hi Liverpool nen an inkhel a, an result kan hre hman lo. 

Palace erawh table-ah 13-na an ni mek a, Magpies nen match 22 ve ve khel tawhin point sarihin an sang zawk. Wolves an hneh hnua an match hmasa berah an chak lehnghal a, February 8 zanah vawi thum chak zawn beiseiin Leeds United an lenchilh zui ang. 

Hetihrual hian Palace thiampuipa Wilfried Zaha chu minute 58-naah hliam vangin lakchhuah a ngai a,  Ivory Coast winger hi he thu buatsaih thleng hian engtia rei nge a chawlh dawn hriat theih a la ni lo. 

Palace boss Roy Hodgson chuan, "Hliam vangin kan talbuai a, ka player-te an in fit leh theih nana hmalak hi a harsa dawn. Zaha hi a inhliam zen zen lo a, ani meuh a inhliam chuan en uluk a ngai dawn - a serious loh hram ka beisei," tiin a sawi. 

Hodgson chuan inkhel thlirletin, "Shelvey goal kha ka en let a, goal mawi tak a ni. Mahse, khami zawhah khan kan khel ṭha a, half time-a thlen kha chuan kan khelh danah khan ka lawm hle a ni," a ti a, a naute khelh dan a fak.