Celtic-in Kilmarnock an sawp

Scottish Premiership inkhelah Celtic chuan manager nei lo Kilmarnock chu 4-0 ngawtin an sawp a, an thiam an la theihnghilh lo tih an pholang. 

January 30 khan Kilmarnock boss Alex Dyer chuan inhriatthiam tawnnain a club hi a chhuahsan a, manager lailawk James Fowler hoa khel team hian Celtic an chelh ngang lo. 

Celtic tan hian captain Scott Brown chuan minute 29-naah goal hmahruai a khung a, goal thum dang erawh second half-a lut vek a ni thung. 

Odsonne Edouard chuan minute 53-naah penalty aṭangin an goal hnihna a khung a, minute 62-naah a chhunzawm leh bawk - Albian Ajeti chuan minute 86-naah a tawp kharin Celtic an chak chiang.

Celtic tan 2021 hi kum ṭha lo emaw tih mai tur a ni. Kilmarnock an hmachhawn hma hian January-ah league match ruk an khel a, vawi khat chiah an chak - vawi hnih tlawmin vawi thum an khingpui an inhnehtawkpui a, Kilmarnock laka an result hian phurna thar a pe ang. 

Scottish Premiership-ah hian Rangers chu hmahruaitu an ni a, league match 26 an khelh tawhah point 72 an nei. Steven Gerrard enkawl team hian nizan khan  St. Johnstone an mikhual a, he thuziak i chhiar meuh chuan an point hmuh zat hi a san belh leh tawh mai thei. 

Celtic hi table-ah pahnihna an ni mek a, he thu buatsaih laia Rangers an phak lohna hi point 20 a ni a, match khatin an khel tlem zawk bawk - Rangers hi champion chiang tawh anga sawi ngam an ni.