Pakua a khel Arsenal an chak lo

David Luiz leh Bernd Leno te hnawhchhuah an ni a, tun hnaia kaltluang tak Arsenal chu chak hmel hmu khat tak Wolverhampton Wanderers lakah 2-1 in an tlawm.

Gunners tana Nicolas Pepe goal hmahruai khung chu Wolves lamin Ruben Neves leh Joao Moutinho te hmangin an chhanglet. Nuno Espirito Santo nauten nikum December 15 hnua a vawi khat nan Molineux Stadium-ah hnehna an chang leh chiah.

Bukayo Saka hliam a dam tawh a, English midfielder hian Thomas Partey ball pek chu lalutin goal ban a per per bakah a goal khung chu VAR hman a nih hnuah offside vanga hnawlsak a ni.

Premier League match hnuhnung pasariha tlawm nei lo Gunners lamin bul an ṭan fuh a, goal khung theihna remchang pawh an insiam zeuh zeuh. Alexandre Lacazette ball pek naran nia lang chu Pepe-a'n box chhungah la lutin minute 32-naah goal hmahruai a khung.

Khualmualah goal an khung hmasa a, tun hnaiah Arsenal tlarhnung a phui ṭhat bawk avangin point thum an hlawh chhuak mai tura ngaih a ni hman. Mahse inkhel a la zo lo, chawlhlawk pawh an la hman loh avangin tawnthu tawpna a la ni lo.

Chawlhlawk an hman hma chiahin box chhunga Willian Jose tlan chu Luiz nen an inkhak palh a, Brazilian defender hian tum reng vanga ti tlu ni lo mah se referee Craig Pawson-a'n penalty pein a hnawt chhuak nghal bawk!

Second half-ah Gunners an inring hman lo, minute 49-naah Moutinho chuan yard 30 zet a hla aṭangin goal kilah a thlawh lut a, keeper Leno tan dan phak a ni lo - player kim lo leh si phur bawk Mikel Arteta naute tan beisei a tlem ta.

Buaina a zual zel, fal taka Adama Traore ball um chu Leno-a'n lak khalh tumin a tlan chhuak a, box pawnah a kutin ball hi a lo khawih. Luiz hnawt chhuaktu Pawson-a'n German player hi minute 72-naah a hnawt chhuak, chak tur a chiang zui nghal bawk.

Arsenal manager Arteta chuan, "Ka naute khan an khel ṭha em em a, a tir lamah khan vannei ila chuan goal thum vel khung thei tur kan ni. David Luiz hnawhchhuah a ni khan boruak a thlak danglam ta vek a ni.

"Kil hrang hrangah ka ennawn leh a, an intawk palh lai ka hmu lo. Kil hrang 50 aṭangin en ṭha leh ni ila chuan eng emaw lai chu hmuh tur a awm mahna le, kil hrang pasarih aṭanga ka en chuan tihpalh ka hmu lo," a ti a, a defender-in red card a hmuh chu khinlet an tum thu a sawi bawk.

Chak se la chuan North London club hi parukna dinhmun luah thei an ni. Mahse point an hlawh chhuah belh loh avangin 10-naah an awm chhunzawm a, season thara European fottball khelh la beisei mah se kawng a harsa tawh dawn.

Wolves manager Nuno Espirito Santo chuan, "Inkhel boruak thlak danglamtu chu penalty kha a ni. Ngun taka ka en hnuin red card leh penalty chungchangah kha chuan referee tan duhthlan tur dang a awm lo niin ka hria.

"Moutinho goal kha a ropuiin a hmuhnawm, player thiam leh theihna nei sang bik a nih avangin khatiang goal khung kha a phu hle. Season hmasa khan thil ṭha leh hmuhnawm tam tak kan ti a, khatiang kha phawrh chhuah leh kan duh," a ti.

Wolves hian season tir lam khan Emirates Stadium-ah 2-1 bawkin hnehna an lo chang tawh. Season hmang ṭha tawk lo mah se point 26 hmuin 14-naah an awm a, Europa League beisei ngam tawh lo mah se inhamtang turin an la ṭha tawk.

*Wolves hian 1978-79 season hnu lama a vawi khat nan season khat chhungin Arsenal vawi hnih an hneh.

*Arteta-a'n 2019 December 26 aṭangin Arsenal a enkawl ṭan a, a hnu lamah Premier League-ah red card vawi kua an hmu tawh, an mahni hnaih bertu aiin vawi ruk ngawtin an hmu hnem.

*Sheffield United leh West Brom (16 goal) tih loah chuan Wolves (15) hi tun season inkhela goal chhuah hmasa ngun an ni.

*Pepe-a'n tun hnaiah league match a inkhel bul a ṭan hnuhnung pali aṭangin goal thum a khung.

*Luiz-a'n 2019 August thla khan Arsenal a zawm a, red card vawi thum hmu tawhin penalty vawi ruk a chawi tawh.

*Arsenal goalkeeper zingah Leno chu Premier League bika hnawh chhuah pahnihna a ni a, 1993 khan West Ham lakah David Seaman chuan red card a lo hmu tawh.

*Molineux Stadium-ah Moutinho-a'n a goal hmasa ber a khung a, goal hmasa ber nei tur hian match 61 a mamawh.

*Granit Xhaka-a'n Wolves nen Gunners tan a match 200-na a khel tling chiah.