Inter ngamtu Cristiano Ronaldo

Cristiano Ronaldo goal hnih hmangin Juventus chuan Inter Milan 2-1 in an hneh. Andrea Pirlo naute hian Coppa Italia semifinal first leg-ah hnehna an chan avangin final lut turin an dinhmun a ṭha tawh.

February 9, Thawhlehni dar 1:15 hian Turin khawpuiah second leg khelh a ni leh dawn a, si phur sa chungin Antonio Conte naute an inlan dawn a, tlang tur chuan goal khat aia tam an khung ngei a ngai dawn.

Ni 16 liam ta lek khan team pahnih hian San Siro-ah Serie A an khel a, mikhual Juventus lamin 2-0 in hnehna an chang. Coppa Italia semifnal-ah an ṭhat dan berin an khel thei lo ve ve a, inkhel hmuhnawmna erawh a nep phah chuang lo.

Inter lamin hrem vangin Romelu Lukaku leh Achraf Hakimi te an chhawr thei lo a, tlarhma lamah Lautaro Martinez thlawp turin Alexis Sanchez dah a ni, an hnungah Arturo Vidal chuan a lo thlawp bawk.

Paulo Dybala leh Aaron Ramsey te hliam tenau vangin an inlan thei lo, striker Alvaro Morata chu bench lamah dah niin Ronaldo chu tlarhma lama rinrawl a ni. Giorgio Chiellini aiah Matthijs de Ligt-a'n bul a ṭan thung.

Ṭan aṭanga minute kuana lekah Martinez-a'n goal hmahruai a khung, Argentine striker hian amah vengtu Dutch defender pet khalhin goal a khung. Inelna hrang hrangah match 1100-na kheltu Gianluigi Buffon tan dan theih tur niin lang mah se a dang zo lo.

Mahse, Inter lawm chhung a rei lo. Manchester United captain hlui Ashley Young-a'n Juan Cuadrado a tih tluk vangin penalty a chawi a, siphurh sut nan Ronaldo-a'n chiang takin a khung.

Portuguese forward hian a la duhtawk mai lo, defender Alessandro Bastoni leh Samir Handanovic te inringthul karah ball laksakin an goal hnihna a khung a, chawlhlawk laiin 2-0 a hma hruaiin goal dang a lut zui tawh lo.

Inter coach Conte chuan, "Kan theih ang tawk chuan kan thawk ṭha thawkhat viau chuan ka hria. Juventus khan kan tihsual zeuh pahnih an chhawr ṭangkai a, khami chauh kha kan danglamna a ni. Goal khatin hniam zawk mah ila thawh leh tumin kan bei ang," a ti.

Second leg-ah chuan Lukaku leh Hakimi te an chhawr thei tawh dawn a, mahse card hmuh vangin Vidal leh Sanchez te an khel thei lo ve leh thung ang - Italian manager Conte tan thluak hman a ngai nasa zual dawn.

Old Lady manager Pirlo chuan, "Inter nen league match kan khelha team kan inrem ang kha chu a ni tawh lo. Mahse ka naute hian Juventus khelh dan tur dik an hriat tawh avangin dinhmun ṭha zawkah kan awm theih phah," a ti.