Marseille-in manager ban dawn?

French Ligue 1 club Marseille chuan an manager Andre Villas-Boas chu a hna aṭangin an chawlhtir lailawk (suspend) a, club kalphung a sawisel avangin a club nen hian an inṭhen ngei dawn niin a lang.

Tun hnaiah Marseille chhungkua an buai, player an lak leh enkawl danah fans lam pawh an lawm lo. Kar hmasa lawk khan fans lamin an training-na hmunah buaina an siam a, hei vang hian an league match khelh tur pawh an khel thei lo.

Thlasik bazar tawp ni khan Celtic aṭangin midfielder Olivier Ntcham an lalut a, manager Villas-Boas chuan an player thar chu ama duhzawng a nih lem loh thu a sawi chhuak a ni.

Chelsea leh Tottenham pawh enkawl tawh Villas-Boas chuan, "Bazar tawp niah player thar kan nei a, Ntcham lakluh chungchangah ka inrawlh lo," a ti a, club lam aṭangin beisei a neih san loh thu a sawi bawk.

Marseille chuan an coach chet dan leh thu sawi chu pawm dam theih loh thil a nih thu an sawi. Portuguese manager hian tun season tawp thleng daih chauh contract a nei tawh a, contract hmang zo loin a chhuah mai a rinawm ta hle.

Ligue 1 season kal laiah Marseille hi pakuana an ni a, inelna lian Champions League-ah inlan ve mah se group stage paltlang zo loin an tla.