Zverev hoin Germany an chak

Nimin khan Alexander Zverev hoin Germany chuan ATP Cup-ah Canada 2-1 in an hneh. Zverev hian singles match hmuhnawm takah Denis Shapovalov hnehin an ram hi a chakpui.

Kum 23 mi Zverev hian Shapovalov lakah 6-7 (5-7), 6-3, 7-6 (7-4) in hnehna a chang hram a, inkhel dangah Jan-Lennard Struff chuan player ṭha Milos Raonic lakah hnehna a la chang ve bawk.

Germany hi doubles match-ah chak lo mah se singles match pahnihah an chak avangin an chungnung zawk. Canada hian an group match lehpekah chuan champion lai leh Novak Djokovic awmna ni bawk Serbia an hmachhawn ang.

World number 7 Zverev chuan, "Player ṭha hlir an inlan a, hei vang hian match zawng zawng a awlsam lo. Australian Open inbuatsaihna a nih rualin ram aiawh a khel kan nih avangin theihtawp chhuah a ngai," a ti.

Inkhel dangah Italy chuan France 2-1 in an hneh a, ram leh ram mipa tennis team hmanga inelnaah hian semifinal lut hmasa ber an ni.

Italy tan Fabio Fognini chuan Benoit Paire chu 6-1, 7-6 (7-2) a hnehin an ram hma a hruaipui. Match hmasa lama Dominic Thiem hneh tawhtu Matteo Berrettini chuan Gael Monfils 6-4,

6-2 in a hneh bawk - France lamin doubles huanga hnehna an chan chuan awmzia a nei phak lo.

Nimin khan Russia chuan Japan an hmachhawn a, an chak a nih chuan semifinal an lut ve bawk ang. Inelna thlengtu leh Australia leh Greece inhmachhawn bawkin result kan hre hman lo thung.