Engtikah nge Liverpool-in nomawi an chawi ang?

"Liverpool an champion ang em?" tih chu Premier League-ah inzawhna a ni tawh lo a, "Engtikah nge Reds hi an champion chian ang?" tih chu zawhna a ni ta zawk. 

Anfield-a Manchester United an hneh khan Kop ho chu, "League nomawi kan chawi dawn e," tiin an zai rual dual dual tawh a, anmahni dang thei tur awmin an hre tawh lo. 

Liverpool fan-te an thiam awm a, match hniha khel tlem chunga point 13-a hma hruai te chuan tu fa nge maw indawm kun reng thei ang le? Reds fan-te hlim phawt mai teh u!

Jurgen Klopp enkawl Liverpool hian league match 16 lek khelh tur an nei tawh a, heng zingah hian vawi 10 an chak chuan an champion ang. 

Kum 1990 hnua league nomawi la chawi leh lo Liverpool hian an duh ang taka nomawi chawi theihna an nei bawk - Everton mual emaw Manchester City khelmuala champion thei dinhmunah an ding!

Liverpool-in an hmelma kumhlun Everton khelmual Goodison Park-ah league nomawi chawi theih dan an nei - chu tur erawh chuan tuna an kal dan anga an kal zel a ngai. 

Reds hian match khat zelah 2.9 point nei ang an ni a, City erawh 2.08 a ni. Hetiang reng hian Reds leh City hi kal ta se chuan March 14-a Everton muala an chak chuan Liverpool hian 23 - 25 inkarin hma an hruai ang a, he inkhel zawhah hian 24 points chauh 'fight' tur a awm tawh dawn avangin Reds an champion ang. 

April 4 hian Liverpool hi Etihad Stadium-ah an leng dawn a, an elpui Manchester City khelmualah Reds hi an champion thei - chu thil thleng tur erawh chuan club pahnih hi an intawn hmaa match zawng zawngah an chak vek a ngai ve ve. 

Liverpool hian hetih hunah hian point 91 an nei ang a, City hian point 72 neiin Reds chu point 19 ngawtin an thlau ang - he inkhel zawhah hian team pahnih tan 18 points bak chuh tur a awm tawh dawn loh avangin Etihad-ah Liverpool an champion thei ang. 

Liverpool-in Goodison emaw Etihad-ah league nomawi an chawi a nih chuan Premier League chanchina champion hma ber record an siam dawn a, an hmelma kumhlun Manchester United-in 2000-01 season-a April 14-a league nomawi an chawi record an khum ang. 

Thla emaw ni ang zawng ni lo, match ang zawnga chhuta champion hma ber chu match nga khelh tur la neia champion United (2000-01) leh City (2017-18) an ni a, Liverpool hi Everton mualah an champion a nih chuan match riat an la bak dawn a, City laka an champion pawhin match ruk chauh a awm tawh dawn.

Liverpool-in season duhawm tak an hman mek avangin record an siam nual tawh a, Pathianni zana United an hneh khan league match 22 hnua table-a hma hruai fal ber record chu an nihrual. 

Chelsea chuan 2005-06 khan match 22 hnuah point 16-in hma an lo hruai fal tawh a, Jose Mourinho hnuaiah point riata sang fal chunga season kharin an champion zui. 

Kum tam a liam ta - kum 1996 kumtir khan Premier League-ah Newcastle United chu point 12-in an sang fal a, mahse manager ropui Sir Alex Ferguson-a 'rilru game' chu Magpies boss Kevin Keegan-a'n a phur zo lo!

Zawi muangin Magpies an ral a, United an che ṭha reng thung - season a tawp meuh chuan point lia sang falin Red Devils an champion daih. He record kher hi chu Liverpool hian 'khum' an duh lo ang. 

Liverpool hian zanin dar 1:30-ah league match khel turin Wolverhampton Wanderers an lenchilh dawn a, Wolves hi club lian ngam tak an nih avangin Liverpool tan fimkhur a finthlak ang.

Reds tan midfielder Fabinho chu November hnua a vawi khat nana bul ṭan tur khawpin a dam ṭha a, Dejan Lovren-a'n training a zawm tawh a, James Milner leh Naby Keita an la dam lo thung. Wolves-in Ruben Vinagre an la chhawr thei dawn lo bawk.