MLS player hlawh hnem ber Javier Hernandez

Manchester United striker hlui Javier Hernandez chu Major League Soccer-a player hlawh hnem ber a ni ta a, Chicharito tia hriat lar striker hian US-a football khel turin LA Galaxy a zawm. 

Kum 31 mi Mexican striker hian kum thum chhung atan contract a ziak a, a hlawh zat chiang taka tarlan ni lo mah se LA Galaxy tana Zlatan Ibrahimovic hlawh zat dollar maktaduai 7.2 a khum dawn avangin kum khatah dollar maktaduai riat chuang hlawh tura ngaih a ni. 

Hernandez chuan, "Ka tan chuan tun hi hun dik tak a ni," tiin US lam a pan chhan a sawi a, Galaxy tan match 58-a goal 53 khungtu Ibra hmun ruak luah erawh thil awlsam a ni lo ang. 

Hammers aṭanga season hmasaa Sevilla pantu striker man zat hi pound maktaduai riat bawr vel nia ngaih a ni a, hei hi a dik a nih chuan MLS-a player manto ber record a siam nghal bawk tihna a ni. 

LA Galaxy general manager Dennis te Kloese chuan, "MLS-a forward hlauhawm ber pawl a nih theih kan beisei. Javier hian top league-ah tha thlah loin goal a khung reng a, tun hnai kum 10 chhunga Mexico player hlawhtling ber a ni bawk," a ti. 

Mexico tan match 109-a goal 52 khung thei Chicharito hian Sevilla-ah beisei phak lo mah se club langsar Man United, Real Madrid, Bayer Leverkusen leh West Ham tan goal khung hna a lo thawh tawh ṭhin avangin LA-ah a inthlahrung lo ang.