Everton laka thilmak thlentirtu Lejeune

Thawhlehni zan Premier League inkhelah comeback ropui a thleng a, Newcastle United chuan injury time-a Florian Lejeune goal hnih khung hmangin Everton chu 2-2 in an inhnehtawkpui!

Everton tan Moise Kean a khel ṭha takzet a, kum 19 mi striker hian Juventus aṭanga English club a pan hnuah beisei phak lo mah se a thiamna a la bo lo tih Magpies lakah a pholang. 

Kean hian minute 30-naah goal hmahruai a khung a, Everton tan match 22-a khelh hnuah a goal hmasa ber a khung ve ta. Merseyside club-in an duhtawk lo. 

Coach Carlo Ancelotti-a'n, "England tana khel turin a ṭha tawk," tia a sawi Dominic Calvert-Lewin chuan a pu thusawi nem nghetin goal tawih zet a khung a, 2-0 a ni. 

Mahse, Magpies an beidawng duh lo. Bench aṭanga luhtir Lejeune chuan Everton defending chhiat zarzoin overhead kick hmangin mawi zetin hun pek belh minute linaah si phurh a sut ṭhen. 

Lejeune hian injury time a thleng tawh tih a hria a, a goal khung pawh a lawm lo. Mahse, hun pek belh minute nganaah French centre back hian buai nuai karah si phurh a sut zo, hun a tawp zui a, 2-2 a ni. 

Newcastle boss Steve Bruce chuan, "Hlawhchhuah neih kan phu hlawl lo! Mahse, kan beidawng duh lo a, a tawpah chuan eng pawh a thleng thei tih kan hmu," a ti!

Everton manager Ancelotti chuan, "Kan khelh danah ka lawm a ni. Ka player-ten hrehawm an ti em em a, mahse anni aiin tawnhriat ka ngah tawh zawk tih ka hrilh.

 

"Champions League final-a 3-0 a hma kan hruai hnuah ka tlawm tawh a ni. A chang chuan beisei loh thil a thleng ve ṭhin," a ti a, Champions League 2005 final-a Liverpool comeback ropui a 

sawi chhuak. 

Ancelotti-a'n AC Milan a enkawl laiin 2005 khan Liverpool nen Champions League final an khel a, first half-ah hma an hruai. Mahse, Liverpool hian captain ropui Steven Gerrard hmanga bul ṭanin second half-ah si phurh an sut zo a, penalty-ah 3-2 in an chak zui.