Police-in Super Cup final an lut

Lalbiakliana Memorial MFA Super Cup final lut turin Mizoram Police chuan nimin khan Lammualah Bethlehem Vengthlang 4-0 in an hneh.

Nizan khan Chanmari FC leh Electric Veng FC ten semifinal hnuhnung zawk an khel a, result hre hman lo mah ila MPL club pahnihin final an khel dawn tih a chiang.

Final hi August 2, Zirtawpni tlai hian Lammualah khelh a ni dawn a, Police hi Super Cup-a an vawi khat final luhna a ni.

Semifinal lut team pali zingah Bethlehem Vengthlang FC chiah MPL club ni lo an awm a, an nem deuh tih a hriat sa avangin an khingpui Mizoram Police an vannei.

Police hian inkhel thunun tehchiam lo mah se minute 23-naah R. Malsawmtluanga ball vawrh ṭha zet chu Lalfakzuala'n um lutin goal-ah a chantir a, chak tur a hriat nghal. Match hnih leka goal 10 khung thei Lalbiakhlua rawn langin Mizoram Police forward hian minute 35-naah box pawn aṭangin BVT lamah a khung leh a, match thum an khelh tawhah goal a la khung vek.

Second half-ah Police-in bul an ṭan ṭha a, rang takin Malsawmfela'n minute nga chhungin goal hnih a khung nghal. Minute 50 a nih chuan goal li a lut a, hemi hnu hian inkhel dul chhoin goal dang a luh belh tawh lo.

Mizoram Police coach Lalbiaksanga Colney chuan, "Kan khelh tawh chinah harsatna kan la tawk lo a, season ṭantirh a nih bawk avangin player enchhin nan kan hmang a, player kan thlak kual nasa. Fitness lam kan la khawih tam lo chungin ka naute fitness-ah ka lawm a, hmasawnna hmuh tur a awm zelin ka hria," tiin Vanglaini a hrilh.

Police hian MFA Super Cup-ah match thum khel tawhin goal 28 an khung tawh a, Chawnpui FC nen an inkhelh ṭuma goal khat an chhuah chu tun inelnaa an goal chhuah awmchhun a ni.