East Bengal coach a bang

Kolkata derby-a Mohun Bagan a ngam loh hnu lawkah East Bengal coach Alejandro Menendez chuan banna a thehlut a, Kolkata club-a sum thawhtu lian ber Quess Corp CEO Subrata Nag chuan, "Mimal leh chhungkaw thil vanga bang a nih thu a sawi," a ti. 

Real Madrid youth team pawh lo enkawl tawh Menendez chuan, "EB ka awm chhunga club hmasawnnaah ka lawm a, min thlaktu pawhin hei aia sang zawk a thlenpui theih ka beisei a ni," tiin a sawi. 

East Bengal hian Inrinniah Chennai City an lenchilh dawn a, February 1-ah Indian Arrows an mikhual bawk ang. Nag chuan, "Feb 1 hmaa coach thar neih hman kan tum," a ti a, Chennai lakah hian assistant coach Bastab Roy leh Marcall Trulls Sevillano ten an kaihhruai a rinawm. 

Kolkata club hian league match sarih an khelhah point riat chiah an la nei a, an match hnuhnung pathumah an tlawm vek!

East Bengal hian nimin khan season tawp thleng atan Ansumana Kromah an lakluh thu an puang zui a, kum 27 mi striker an lakluhah hian fan-te an lawm lo hle.