Solskjaer-a fapain United a hmachhawn

Manchester United chuan Thawhlehni zan khan Norwegian club Kristiansund chu pre season friendly an khelh pui a, injury time-a Juan Mata penalty hmangin 1-0 in an hneh hram.

Oslo-a inkhelah hian Ole Gunnar Solskjaer-a fapa kum 19 mi Noah chu minute 87-naah a inlan. Norwegian manager Solskjaer chuan, "Noah kha mipui 28,000 hmaah a inlan a, Norwegian player tan chuan hetiang hi a thleng zen zen lo. Elijah ka bulah nuamti takin a awm bawk," tiin a fapa te nena khelmuala an che tla ho chu chhinchhiahtlak a nih thu a sawi.

Kum 46 mi Solskjaer hi a seilenna khaw Kristiansund club Clausenengen aṭangin a inzir chhuak a, he club tan hian match 100 chuang a khel hman. Kum 2003 khan Clausenengen leh an elpui CFK te chu inzawmin team thar Kristiansund BK an din. Solskjaer-a fapa Noah hi a pa ang lo takin midfielder a ni a, United coaching staff zinga mi Michael Carrick khelh dan a entawn thung.

Manchester United hian Norwegian club lakah hian inkhel thunun mah se goal erawh an khung thei lo a, injury time-a Paul Pogba penalty hlawhchhuah chu Juan Mata-a'n 'cool' takin chakna goal khung nan a hmang. United hian khawmualpui danga an zin chhuahna match ngaah Perth Glory (2-0), Leeds United (4-0), Inter Milan (1-0), Tottenham (2-1) leh Kristiansund (1-0) te hmachhawnin an chak vek. Inrinni zan dar 10:06-ah Solskjaer hote hian Millennium Stadium, Cardiff-ah AC Milan nen an inkhel leh ang.