Ronaldo chungah fans lungawi lo - sum an phut!

Pre-season tour neia zin mek Juventus tan Cristiano Ronaldo a inlan loh avangin fans an lungawi lo a, Italian champion leh K League All Star inkhel huaihawttu te khingin court-ah an kal. 

Kar hmasa Zirtawpni khan South Korean K-League All Star leh Juventus ten friendly match an khel a, 3-3 in team pahnih an inhnehtawk. Fans tam takin Ronaldo inlan beiseiin ticket an lei a, mahse Portugal international hi bench-ah a ṭhu tluan. 

Hei hi fans ṭhenkhat chuan hrethiam loin Seoul law firm Myungan-ah an zualko a, ticket pakhat manah won 70,000 (Rs. 4,079), ticket commission fee-ah won 1,000 (Rs. 58) leh rilru tihnat manah won maktaduai khat (Rs. 58,277) an phut. 

Myungan-a ukil pakhat chuan, "Hetiang thubuaiah chuan a tlangpui thuin ticket man hi in pek let mai a ni ṭhin. Mahse, tun bikah hi chuan Ronaldo hmang ṭangkaiin advertisement dik lo tak hmangin company hian fan-te a bum a, special case-ah kan dah. 

"Fan-te hi Ronaldo atchilh tak taktu te an ni a, chumi aṭanga thlir chuan rilru nat man an ṭhing pawh hi thil awm tak a ni," a ti. Myungan law firm lamin an sawi dan chuan court-a zualko te hi a tirah chuan pahnih chauh an ni a, mahse call tam tak an dawn belh avangin fans 60,000 velin thubuai an thehluh an ring!

Juventus leh K League All star inkhelh huaihawttu The Fasta CEO  Robin Chang chu inkhelh zawha media a hmachhawnnaah a ṭap a, an inrem ang chuan Ronaldo hi minute 45 tal inlan tur a nih thu a sawi. Chang chuan, "Juventus vice president Pavel Nedved ka hmu nghal a, mahse 'Ronaldo khelh chu keipawhin ka duh a, mahse a inlan duh tlat si lo a ni. Min hrethiam rawh, tih theih engmah ka nei lo' tiin min chhang a ni," a ti. 

Hetihlai hian South Korean football league sang ber K League thuneitute chuan Juventus hnenah an lungawi loh thu lehkha an thawn tih an sawi. Juventus boss Maurizio Sarri chuan inkhelh zawhah khan Ronaldo chuan hliam tenau a neih thu a lo sawi tawh a, "Club chairman Andrea Agnelli leh Ronaldo te nen kan inbia a, a chawlh hahdam ṭha kan ti tlang a ni," a ti. 

Fans tam takin social media lamah Ronaldo laka an lungawi lohna an au chhuahpui mek a, inkhelh lai ngei pawh hian fans ṭhenkhat chu 'Lionel Messi' tiin an au rual hial!