Taekwondo Fight League hmawrbawk zan

Zanin dar 8:00 hian GIG Motors Taekwondo Fight League final chu Electirc Veng YMA Hall-ah khelh a ni dawn a, kumina team ṭha pahnih Armed Veng Warriors leh Armed Veng South Pasalṭha te an inhmachhawn ang.

TFL hi 2016-ah neih ṭan niin Ramhlun Sporting Club chu champion hmasa ber an ni, 2017-ah Armed Veng Warrios chuan nomawi an chawi ve leh thung - nikumah inelna a awm lo. Kuminah Warriors hian an veng ṭhenawm lakah an nomawi kawl lai an humhim thei dawn em tih chu fiahin a awm dawn.

Tun season TFL-ah Armed Veng South Pasalṭha hian beisei aia ṭhain an khel a, league match li an khelhah hnehna chang vekin, semifinal-ah palina St Joseph HSS RSC Fighter chu harsatna nei loin an paltlang bawk.

An veng ṭhenawm Armed Veng pawh Pasalṭha hian an zuah lo, league round-a an intawn ṭumin an hneh; an hneh avang hian semifinal an lut chiang chiah bawk. An hneh tawh sa hmachhawn leh tur an nih avangin a vawi khat nana nomawi chawi an tum ngam dawn, an champion a nih chuan champion thei team pathumna an ni nghal ang.

Armed Veng South-in H. Vanlalfela leh K. Malsawm­tluanga te chu an hmachhuan leh tur an ni dawn a, anni pahnih hi an khelh fuh ni chuan tualchhung player dangte tukdawl thei an ni a, an lakah Warriors lam an fimkhur a ngai dawn.

Beisei angin Armed Veng Warriors lamin inelna bul an ṭan fuh lo a, league match an khelh hmasak pathumah vawi hnih an tlawm. Mahse, a hun takah champion zia chhuahin an mamawh zat point an hmu a, semifinal-ah league round lama an tluk loh Republic Vengthlang Fighters hnehin final an lut.

Pasalṭha lakah Warriors hi tlawm tawh mah se an intawn hmasaka score kha 125-123 niin, an inthlauhna chu point hnih chauh a ni tih hriat tel a ṭha ang. Khami ṭum khan Warriors lam chhuanvawr Vanlalmawipuia chu Fighter of the Night atan thlan a ni; zaninah pawh ani hi a hmuhnawm leh dawn.

Team pahnih hian zan dang ang bawkin fans an nei ṭha leh dawn a, veng inṭhenawm ni mah se TFL huangah chuan zanin atan bik hmelma an ni dawn. Player inhmachhawn an pawimawh rualin a pawn aṭanga au phurtu nei ṭha zawk nih a pawimawh thei ang.

TFL season thumnaah hian senior bakah kum naupang lam inelna 'cadet' huang buatsaih a ni a, zanin tho hian Zopa Goldsmith Chawnpui leh St Joseph HSS RSC Fighters ten a thiam ber nih an inchuh ve bawk dawn a ni.

Thawhlehni zan khan semi­final khelh a ni a, Zopa Goldsmith Chawnpui hian Exodus English School chu 188-122 in an hneh, semifinal lehlamah St Joseph Higher Secondary School, Ramhlun Sporting Club Fighters pawhin Aizawl Taekwondo Academy, Electric Veng Fighters chu 140-139 a hnehin final an inhlangkai ve bawk.

TFL hmawrbawk zan hian team tel zawng zawng tan 'TFL Dance' a awm dawn a, senior team ten nomawi an inchuh hmain finalist team pahnih aṭangin 'Final Dance Battle' a awm bawk ang - inkhel ṭan hmain mit a tlai dawn tihna a ni.