The Best FIFA Football Awards Dawng thei tur zingah Virgil van Dijk
FIFA hnuaia chawimawina sang ber The Best FIFA Football Awards dawng thei tur hming chu nizan khan tarchhuah a ni a, Liverpool defender Virgil van Dijk chu Best FIFA Men's Player Award dawng thei tura zingah telh a ni.
'The Best' chu...
Tun hmain FIFA hnuaia mimal chawimawina sang ber hi FIFA World Player of the Year tih a ni ṭhin a, kum 2010 khan France Football nen thawk hoin Ballon d'Or chu FIFA Ballon d'Or tih a ni. Kum 2016 aṭang khan FIFA an kal hrang leh a, mipa bikah Cristiano Ronaldo chuan kum 2016 leh 2017 khan chawimawina dawngin nikum khan Luka Modric chuan a dawng ve bawk.
Kuminah hian mipa leh hmeichhe player ṭha bakah mipa leh hmeichhe team enkawltu coach ṭha an thlang dawn. Heng chawimawina langsar pali bakah hian mipa leh hmeichhe goalkeeper, goal mawi ber atan FIFA Puskas Award leh FIFA Fan Award te a awm dawn bawk.
2019 Best FIFA Football Awards dawng thei tura thlanchhuahte hi 25 May 2018 leh 7 July 2019 inkara an chet dan a zira expert-ten an thlanchhuah a ni. Thlanchhuahte hi journalist, national team coach leh captain ten an thlang leh a, hetah hian fan-te pawhin website kaltlangin an thlang thei bawk.
Best FIFA Football Awards Ceremony hi September 23 hian Milan-ah neih tur a ni a, hemi hma hian category tina chawimawina dawng thei tur mi pathum puanchhuah a ni ang.
Ronaldo leh Messi
FIFA hnuaia mimal chawimawina hi Cristiano Ronaldo leh Lionel Messi ten an inlak chhawk ṭhin. Kum 2008 khan Ronaldo chu FIFA World Player of the Year-ah thlan a ni a, Messi nen vawi nga ve ve an dawng.
Nikum khan FIFA World Cup-a Croatia final hruai thlengtu Luka Modric rawn lang nawlhin Ronaldo leh Messi hun chu kum 10 hnuah a tawp. Best FIFA Men's Player 2019 dawng thei tur zingah player ṭha pahnih hi an rawn lang leh ta, Modric erawh lang pha tawh loin Ronaldo leh Messi dal thei tur zingah Netherlands leh Liverpool defender Virgil van Dijk chu hming langsar a ni.
Kum 28 mi Van Dijk bakah Sadio Mane leh Mohamed Salah te hming a lang a, Liverpool-in player an thawh hnem ber.