Aizawl FC leh Churchill an inhnehtawk

Nilaini zan khan I League table chung pahnih Aizawl FC leh Churchill Brothers te an inkhel a, goal a lut lo. Goan club hi table chungah berah an awm chhunzawm a, Mizo club erawh point khat chauh an hlawhchhuah avangin palinaah an tla thla thung.

I League inkhel dangah Sudeva Delhi-in Chennai City 4-0 in an sawp a, Delhi club hian Aizawl FC nen point nga hmu mah se goal difference hmangin an sang zawk. Nimin tlai khan Real Kashmir-in Indian Arrows 3-0 in an hneh a, table-ah pahnihnaah an inhlangkai.

Aizawl FC coach Yan Law-a'n inkhel bul ṭantute a siksawi a, starting eleven-ah Mizo 10 awmin Churchill Brothers tana bul ṭantu Vanlalduatsanga nen khelmualah Mizo 11 an awm.

Tlarhnung laiah Chhinga Veng hunlaia inkawp tawh ṭhin PC Laldinpuia leh Vanlalzuidika Chhakchhuak te an awm dun a, mual sirah Lalfelkima leh K. Lalmalsawma te an awm.

Churchill an hmachhawn miau avangin tlarhnung pui turin Alfred Kemah Jaryan chauh duh khawp loin Kawnpui tlangval Lalengmawia'n bul a rawn ṭan. Mual ding lam aṭanga nawr turin Brandon Vanlalremdika a awm a, AIFF academy aṭanga inzir chhuak B. Rohmingthanga bul ṭanna hun ṭha pek a ni bawk.

Siaha tlangval MC Malsawmzuala tlarhmaah a mal tlat a, a hnung chiahah R. Malsawmtluanga a awm. Churchill-in top scorer ni mek Clayvin Zuniga an chhawr thei lo a, match ṭan hmain head coach Fernando Varela hnenah January 2021 coach of the month chawimawina hlan a ni.

Kalyani Stadium-ah inkhel a hmuhnawm nghal. Churchill tana Bryce Miranda corner pet chu keeper Lalmuansanga'n a man nghet thei lo a, hemi per su leh thei tur Churchill player an awm lo hlauh. Aizawl FC pawhin chance ṭha an insiam thuai a, minute 10-naah MC Malsawmzuala'n yard 25 aṭangin goal ban a pet per a, keeper Shilton Paul a che lo.

Goal club bawkin chance ṭha an nei a Kingslee Fernandes pass chu Shubert Pereira-a'n changin petna tur khawp a insiam a, goal-ah ṭha zetin pet mah se Muansanga'n a dang ṭha tazket. Shubert bawk hian first half tawp hma hretin hla takin aṭangin goal-ah a 'risk' a, Muansanga'n a tih tur a tih avangin goal hmuh tur a awm lo.

Goal lut a lut lo nachungin inkhel a hmuhnawm zel a, minute 57-naah MC-a'n fing takin ball a vawrh lut a, substitute Ramhlunchhunga'n la thla ṭha mah se keeper Shilton Paul chauh a hmachhawn hnuah goal zawnah pet thei lo. 

Slovenian forward Luka Majcen pawhin goal khung theihna hun ṭha a nei a, Churchill forward ball pet hi Muansanga tan a harsa lo. Bethlehem Vengthlang tlangval Muansanga'n Mizo club goal a venghim a, man of the match-a thlan a ni.

Aizawl FC-in Indian Arrows laka point khat chauh an hmuh a pawi chho zel. Nimin tlai inkhelah Real Kashmir-in Indian Arrows hi 6-0 in an sawp a, point thum hlu tak an hmuh avangin pahnihnaah an awm.

Amaherawhchu Real Kashmir hian February 8, Thawhṭanni tlai dar 4:00-ah Churchill Brothers an hmachhawn dawn a, Mizo club tan lehthalna hun ṭha a inher ang.

Aizawl FC hian February 9, Thawhlehni zanah Trau an hmachhawn dawn a, Yan Law-a hoten nomawi an duh a nih chuan point thum hlawhchhuah ngei a ṭul dawn a ni.