Thawnthu hlui her lumtu LiverPUL!

Hmanah chuan Liverpool-in club lian leh langsar zawk an hneh hnu lawkin club tenau lakah an mualpho ṭhin a, kum 30 zet chu league nomawi chawi loin an awm hial phah. 

Jurgen Klopp-a'n Liverpool thawnthu ngaihnawm lo thaibo a, beiseina thar nena team ropui tak a dinchhuah chu a tlu leh ta mek a, he team ṭha hian thawnthu ngaihnawm lo zet kha an her lum leh mek. 

Nilaini zan Premier League inkhelah Liverpool chuan 1-0 in an mikhual Brighton & Hove Albion an ngam lo a, Steven Alzate chuan inkhela goal awmchhun hi a khung. 

Liverpool-in hnehna an chan zawh loh avangin table-ah palina an ni mek a, table chung ber luahtu Manchester City chu match khata khel tam chungin point sarihin an phak lo mek - Pathianni zan dar 10:00-ah City hi an mikhual zui dawn!

Hliam vanga Liverpool talbuaizia hrilh nawn fo kan ngai lo a, hei hian an result-ah pawh thui takin nghawng a nei tih a chiang reng. 

December 19-a 7-0 ngawta Crystal Palace an sawp hnu, Brighton an hmachhawn hma khan Reds hian league-ah match sarih an khel a, vawi hnih chiah hnehna an chang.

Mahse, match nga ngawt a zawna an chak loh hnu khan team ṭha Tottenham Hotspur leh West Ham chu khualmualah 3-1 ve vein an hneh a, Liverpool an tho leh taah mi tam takin an ngai. 

A lan ang ngawt erawh a ni lo - Anfield-ah a zawna a vawi hnih nan Liverpool an tlawm a, October 1984 hnua a vawi khat nan Anfield-ah match thum chhung chu goal an khung tawh lo.

Brighton boss Graham Potter-a'n Anfield-a inkhelh hautakzia a hrechiang a, Premier League champion an lenchilh hma hian Anfield-a lenluh chu, "Football-a chona hautak ber pawl," tiin a sawi. 

Inkhelh hmaa Potter-a thusawi hi a sawi lai chuan a pawm pui theih thlap a, club tenau Brighton tan draw result ringawt pawh Anfield-ah chuan result duhawm a ni. 

Mahse, rin loh takin Brighton-in inkhel an thunun zawk a, Seagulls (Brighton sawina) hian vanneih vang ni loin an phu ang ngeiin hnehna an chang. Brighton tan wing back Dan Burn a hmuhnawm a, first half-a a goal khung lohte chu uiawm a tling. 

Burn hian goal khung lo mah se minute 56-naa Alzate goal khung nan erawh a thawhhlawk a, a ball tauh luh chu Reds centre back Nathaniel Phillips chuan a ke hmawr chauha tawk hmanin Alzate-a per a, goal-ah a lut daih!

Spurs leh Hammers laka an khelh dan aṭanga teh tur a nih chuan Liverpool tan champion a beisei ngam a, mahse, Brighton laka an khelh danah erawh top four pawh a harsa dawn. 

Inkhel ṭantir lamah Mohamed Salah-a'n chance duhawm nei mah se crossbar chungah a thlawh a, hemi hnuah Liverpool an hlauhawm chhunzawm tawh lo - inkhelh chhung zawngin shot 11 chiah an nei a, heng zinga pakhat chiah hi target zawnah a kal!

December 16-a Tottenham an hneh hnuah khan Liverpool hi Anfield-ah an chak leh tawh lo a, minute 348 zet chu an mualah hian goal an khung ta lo - Klopp tan chuan lu haina tham a ni a, mangan a hun. 

German coach tan a tlarhma ten goal an khung leh theih dan tur hriatchhuah chu tih makmawh a ni a, match ruk chhung goal chhuah lo tawh City an mikhual zui dawn avangin a awlsam dawn lo. 

Reds hian damlohna avangin goalkeeper Alisson an chhawr thei lo tih hriat tel a ṭha a, Fabinho inhliam vangin Jordan Henderson chu tlarhnungah a khel a, a kawppui hi tawnhriat nei tlem Phillips a ni. 

Tlarhmaah Sadio Mane a inhliam bawk a, Salah, Firmino leh Shaqiri an inkawp a ṭul phah. Jurgen Klopp tan a hliam neihsa pawh mangan pui tham a ni a, dam se, first XI chang tur player pathum a chhawr theih loh lehzel avangin a harsa. 

A tawi zawnga sawi chuan Liverpool hian chhuanlam dap duh se, chhuanlam tur tam tak a awm - mahse, fixtures-in chhuanlam a ngaihtuah lo a, a harsat ber lai pawha point hlawh chhuakte hi champion ṭhin chu an ni.

Harhtharna chang Brighton player-te khelh ṭhat kha chhuanlam hmanga thub bo mai atan chuan a uiawm bawk - an league match hnuhnung paliah goal an chhuah lo a, hetihchhung hian Leeds United, Spurs leh Liverpool an hneh thei a, Fulham an inhnehtawkpui thung. 

Kar hmasa khan khualmualah a zawnin game kan nei a, a hautak em a ni. Kan rilru leh taksa a inpeih tawk lo niin a lang ber a, ball kan hloh awlsam mah mah ṭhin. 

A chang chuan, ka naute kha an rilru lamah an hnual hle ni ten a lang ṭhin a, kan theihna angin kan khel chhuak lo. Brighton tan hna kan tih awlsamsak a ni ber a, chutihrual chuan an khel ṭha hle. 

Brighton khan chak an phu a, chu chu rinhlelh tur a awm lo. Ka tana pawimawh ber chu engvanga tlawm nge kan nih zawnchhuah hi a ni a, a chhan hriat a ngai a ni. Kan hmuhnawm lo takzet.

Tuna kan tih theih chu thil thleng aṭanga inzir a ni a, a siamṭha theitu chu player bawk an ni. Kar harsa tak a ni a, zaninah khan kan theihna angin kan khel lo. City-in result duhawm tak an nei chho a, kan insiamṭhat vat a ngai.

Ball kan chan leh chan loh lai pawhin kan huaisenzia kan pholang a, kan theihna zawng zawng nen kan tlarhnung kan ven avangin team ṭha takin chance an nei mumal lo hial a, keinin chance kan insiam thung. 

Liverpool hi top team an nih avangin Anfield-a point hlawhchhuah hi thil awlsam a ni lo a, he league-ah hian kan theihtawp kan chhuah ve reng a ni. Game tin a harsa em em vek a, he kan chakna hi fan-te leh he club chhungkua tan ka hlan - keini ang club tan chuan Anfield-a chak chu thil harsa tak a ni. 

Tun dinhmun aṭanga thlir chuan nomawi chawi thei zingah kan tel lo. Point sarih ngawtin City kan thlau a, keini aiin match khatin an khel tlem bawk. 

Kan dinhmun angah hian ding se, point 10 velin min thlau ve ta se, anni pawhin ka sawi ang tho hi an sawi ang. Mite hriat ṭhin Liverpool kha kan kaihthawh leh a ngai a ni.