Manchester City an chungnung

Pep Guardiola kaihhruai Manchester City danglamna a lang zel. Nilaini zan Premier League inkhelah City hian Burnley 2-0 in an hneh a, tun hnai an league match hnuhnung 13 zetah hnehna an chang ta.

Man City tan hian Gabriel Jesus-a'n goal hmahruai a khung a, forward Raheem Sterling chuan goal hnihna khung bawkin chawlhlawk hmain chak tur a chiang - khualmualah harsa lutuk loin point thum an hmu.

Manchester United-in an khingpui Southampton 9-0 a hnehin City hi table-ah an nihrual hman a, mahse Pep-a naute hian tunah chuan point thumin hma an hruai fal, match khatin an khel tlem bawk.

Bernardo Silva goal shot chu goalkeeper Nick Pope-a'n lo dang mah se a beng per ṭha tawk lo, minute thumna lekah striker Jesus hmaah tak a nem chhuah avangin hnai tak aṭangin Brazil international hian a tauh lut.

Mikhual team lamin ball chang hnemin inkhel an thunun, chawlhlawk hma deuhin tun hnaia khel ṭha thei tak Ilkay Gundogan-a cross chu vengtu nei lo Sterling chuan a lo khung, English forward tan harsatna a awm lo.

Team pahnih an intawn hmasaa hattrick siamtu Riyad Mahrez-a'n an goal thumna khungah inngai mah se offside vanga pawm a ni lo. Tun hnaia tlarhnung phui tak City an ding khawng a, Sean Dyche nauten goal zawna pet an nei lo hial a ni.

Premier League manager ropui bera ngaih Sir Alex Ferguson khan, "Goal khung chuan inkhelah hnehna a chanpui ang che, tlarhnung phui chuan nomawi a chawipui ang che," tiin a lo sawi tawh. Tun hnaiah City hian an league match hnuhnung parukah goal an chhuah lo.

Inelna hrang hrangah match 20 chhung tlawm nei loin an kaltluang ta a, heng hun chhung hian goal li chauh an chhuah - a zawnin match 13 an chak, kum 19 liam taa Arsenal record ang kha an nihrual.

Season hmasa khan an tlarhnung phui lo vangin beisei an phak lo. Kuminah erawh Ruben Dias an nei tawh a, Portuguese defender hian John Stones emaw Aymeric Laporte emaw pawh dinpui se tlarhnung laiah an nghet tawk viau zel.

Sergio Aguero chhawr thei lo mah se tun hnaiah Jesus-a'n a goal khung theihna a nei let mek a, midfielder pawimawh Kevin de Bruyne awm loh karah Germany midfielder Gundogan chuan a hmun ruak a luah zo rih hle.

Manchester City an kaltluang a, tunah chuan fiahna hautak leh khirhkhan an hmachhawn ṭan dawn. Aguero leh De Bruyne te tel loin an paltlang zo ang em? tih chu zawhna lian tak, a chhanna kan hmuh thuai tur a ni.

February 7, Pathianni zan hian champion lai Liverpool an lenchilh dawn a, FA Cup lamah Swansea khelmual an tlawh dawn bakah tun thla chhungin league bikah Tottenham leh Arsenal an hmachhawn a ngai dawn bawk.

Man City manager Guardiola chuan, "Hmasawnna tur kan la ngah, tun ṭum kan inkhelah pawh khan awlsam taka lak theih leh chinfel mai theih tura lang tihsual kan la ngah viau. Burnley kha team ṭha tak an ni a, hma taka goal kan nei kha kan vanneih phah.

"Aguero hliam a dam tawh a, hri leng lakah pawh a fihlim tawh. Mahse training a la nei mumal lo, chuvangin Jesus a pawimawh hle. Striker tan chuan goal khung a ngai a, tun hnaia a hnathawh danah lawmna tur a tam," tiin Jesus chungchang a sawi bawk.

Premier League season kal laiah Burnley hian goal 13 chauh an la khung a, goal khung tlem ber an ni, an hneh loh City hian goal 39 khung tawhin goal khung hnem ber Man United chuan point 46 zet an nei tawh.

Dyche-a nauten ball possession 25% an nei a, City nen an intawn hnuhnung pariatah chak lo vekin goal 30 an chhuah - goal khat chauh an khung ve thung! Pep-a naute an ngam lo takzet tih a chiang.

Burnley manager Dyche chuan, "Manchester City hi team ṭha tak an ni, goal khung leh a venhim kawngah an ṭha takzet. Inven tum viau mah ila kan chak lohna lai thuruk an hmu zel, tun ṭum atan chuan point thum an hmu kha thil awm tak a ni.

"Tlarhnung sira mi ten ball an sem thei a, a laia mi te an khawng ṭha hle. Midfielder ṭhenkhatin goal nawr kawngah an thawhhlawk laiin ṭhenkhat chuan a venhim kawngah hna an thawk ṭha hle bawk," tiin an hneh loh City chu a dah chungnung hle. Inrinni zanah Brighton an hmachhawn leh nghal ang.