Australian Open a kaltlang dawn

Tennis player, official leh coaching staff mi 500 aṭanga 600 bawr vel chu khunghran leh an ngai dawn, an thlenna hotel a hnathawkin hri a lo kai avangin an dinhmun en fiah nawn a ngai a ni.

Coronavirus vangin buaina hi thleng mah se tournament director Craig Tiley chuan Australian Open an buatsaih tlang tur thu a sawi. Inelna hi February 8 aṭangin main draw khelh ṭan a ni ang.

Australian Open khel turte hi hri leng inkaihhruaina dan angin ni 14 khung hran an ni tawh. Tun kar aṭangin player ten training an nei tawh a, player ṭhenkhat chuan inbuatsaihna tournament tenau an khel bawk.

Mahse, tun hnaiah hotel hnathawktuin hri a kai tih hmuhchhuah a ni a, hei vang hian a hnathawhna hotel-a thlengte chu endik ṭhat leh vek an ngai dawn a, anni hian training nei mumal hman loin inelna an hmachhawn a ngai dawn tihna a ni.

Tiley chuan, "Tun dinhmunah chuan kan ruahmansa ang khan kaltlang kan tum, thil tih danglam tumna a la awm lo," a ti. Australian Open hi a hmunah entu an awm thei dawn a, mahse season danga stadium khat punkhawm ang kha chu a theih dawn lo.