Liverpool pre-season a tawp; hmabak City

European champion Liverpool chuan pre-season tour an hmang zo ta a, an match hnuhnung berah 3-1 in Lyon an hneh. 

Liverpool hian Pathianni zan dar 7:30-ah Manchester City nen Community Shield an khel dawn a, Lyon laka an chak hian City nena an inkhel tur atan beiseina a siamsak ang. 

Reds hi match li chhung chu a zawnin an chak zo lo a, mahse hetih chhung zawng hian an chhuanvawr Alisson, Roberto Firmino, Sadio Mane leh Mohamed Salah te an tel lo. Lyon lakah erawh Alisson, Firmino leh Salah an tel ta a, harsatna nei loin Liverpool hian hnehna an chang. 

Liverpool hian pre-season-a an match hmasa berah Tranmere Rovers chu 6-0 ngawtin an sawp nghal a, Bradford City lakah 3-1 a chak bawkin harsatna an tawk lo. 

Mahse, USA-a tour an neih hnuah Liverpool an buai ṭan - Borussia Dortmund (3-2), Sevilla (2-1), Sporting Lisbon (2-2) leh Napoli (3-0) lakah an chak zo lo vek. Season hmasaa goal an chhuah tlem avanga hming ṭha club hian US-ah ringawt goal 10 an chhuah a, City lakah hnehna chan an tum dawn a nih chuan tlarhnung hi in ennawn ngai tur a ni. 

Hetih chhung zawng hian Klopp erawhin a player-te a ring tlat, "Player pawimawh paruk tel loin kan khel a ni," a ti - hetihlai hian Naby Keita leh Xherdan Shaqiri chu hliam vangin an chawl bawk. 

Lyon lakah erawh Community Shield zawha squad zawm tur Mane tih loh zawng an kim a, Alisson, Salah, Firmino, Shaqiri leh Keita te chu inkhel bul ṭan zingah an tel. 

Mahse, chawlh hmang zo hlim Alisson-a'n ngai a la awh lo a, a chetsual thup a tumna lamah Moussa Dembele-a tih tluk avangin penalty a chawi a, Memphis Depay-a'n goal hmahruai khung nan a hmang. Liverpool-in ṭum danga an neih loh Firmino an neih tawh avangin minute 17-naah Brazilian forward hmangin si phurh an sut zui a, Joachim Andersen (own goal) leh Harry Wilson ten an khung bawk. 

Lyon laka chiang taka lang chu an player langsar te an kir leh tak avangin si an phurh hnuah pawh Reds player-ten beiseina an nei a, team danglam an ni. 

City an hmachhawn hmaa hnehna an chang hi Jurgen Klopp tan chuan thil lawmawm a ni a, match li chak zawh loh hnua chak hi inrintawkna neih nan a pawimawh. 

Mane awm dawn lo mah se Salah leh Firmino awm ringawt pawh hi thlamuanna tham a ni a, Alisson che sual zauh erawh Klopp tan ngaihtuahna tibuaitu a tling phak ang. German coach hian Community Shield-ah tih mai mai a tum lo tih sawiin, "Final a ni miau a, nomawi chawi ka tum ang," a lo ti tawh.

City hi Wolves lakah penalty hmangin an tlawm tih loh chu pre-season match li an khelhah vawi thum an chak a, kar hmasa khan an pre-season match hnuhnung ber an khel tawh. 

Klopp-a'n nipui transfer-ah sum an hman nat loh tur thu a sawi ang ngeiin Liverpool an reh a, pound maktaduai 1.3 man Sepp van den Berg leh zângnadawmna pek tur Harvey Elliott an la tih loh chu player thar lakluh an nei lo. 

Hetihlai hian Ben Woodburn chuan loan-in Oxford United a zawm a, kum 19 mi forward hian season hmasa kha Championship khelin Sheffield United-ah loan-in hun a lo hmang tawh. Lyon lakah Harry Wilson-a'n penalty box pawn aṭangin mawi zetin goal a khung a, mahse season hmasaa Derby County lama loan-a hun hmangtu hi a hmalam hun a la chiang lo. 

Bournemouth chuan Wilson hi pound maktaduai 25-a lakluh an inhuam nia sawi a awm a, Klopp chuan, "Club leh Wilson tana ṭha ber turin thutlukna kan siam ang," tiin a sawi.