Best FIFA Football Awards Tu nge a thiam ber ni dawn?

Khawvela football thuneitu sang ber FIFA chuan Nilaini zan khan kum danga an lo tih ṭhin angin Best FIFA Football Awards chawimawina dawng thei tur hming a chhawp chhuak a, Neymar hming a tel lo. 

Cristiano Ronaldo leh Lionel Messi chu ṭum dang ang bawkin an lang leh a, mahse tun ṭum erawh dawng tura rinkai ber an ni ta lo - Virgil van Dijk chu hming ri ring ber a ni. Player 10 chhawpchhuah zingah Liverpool-in player pathum neiin an thawh hnem ber a, VVD bakah hian Mohamed Salah leh Sadio Mane te hming a lang. 

Hetihrual hian lang tura beisei zingah Alisson Becker leh Roberto Firmino tan hmun a awm lo a, Antoine Griezmann leh Neymar an lang phak bik lo. 

Season hmasaa he chawimawina dawngtu chu Luka Modric a ni a, Croatian midfielder hian Real Madrid tan Champions League nomawi a chawi bakah World Cup final a khel. 

Modric-a'n chawimawina a dawn khan kum 11 chhunga Cristiano Ronaldo emaw Lionel Messi ten footballer ṭha ber chawimawina an dawn loh vawi khatna a ni. Croatia international Modric hian, "He chawimawina hi ka ta bik chauh a ni lo," a ti zui a, forward ni kher loin lawmman an dawng chu hnehna ang hialah a ngai. 

Mahse, tun season-ah erawh Real an chet ṭhat loh avangin Modric hming a lang lo a, kum 2016-a Ballon d’Or aṭanga kal hranga FIFA-in award an sem leh hnua Real Madrid player an lan lohna hmasa ber a ni. 

Khawvela footballer manto ber Neymar tan hmun a awm lo. Brazilian forward hian season hman zawh takah khan hliam vangin a hmel a lan tam lo a, hei vanga lang lo hi niin a lang. 

Neymar hian hliam chungin match 28 erawh a khel hman tho a, goal 23 a khung - Ligue 1 nomawi a chawi bawk a, hliam vang thoin Copa America an champion-naah a inlan lo zui. Neymar tan kum ṭha a ni lo. "Messi leh Ronaldo nen huang khatah kan awm tawh," tih hialin insawi mah se Antoine Griezmann-a'n ngaihsan a la hlawh tawk lo a, player pahnih 'level' thleng tur chuan tih tur tam tak a la nei tih FIFA awards hmangin hrilh hriat a ni. 

Kum 28 mi forward hian season hman zawh takah khan match 48-a khelhah goal 21 a khung a, nomawi chawi erawh a nei lo - nipui transfer-ah Barcelona a pan a, nomawi leh mimal hmingṭhatna chu a thlir tur a ni ang. 

Alisson Becker leh Roberto Firmino ten Liverpool tan Champions League nomawi an chawi a, Copa America-ah Brazil an champion pui bawk. 

Mahse, player pahnih tan Best FIFA Men’s Player ni thei tur player 10 zingah hmun a awm chuang lo! Liverpool tlarhnung phui chhanah VVD-a'n fak a phu a, Alisson ṭangkaizia hmuh hmaih a ni erawh a mak. Firmino-a'n Salah leh Mane angin goal khung tam lo mah se a khelh danin Liverpool a puihzia chu hriat sa a ni a, Copa America-a Brazil tana a ṭangkaina thlirin player 10 zinga tel hi chu a phu. 

Bernardo Silva-a'n Manchester City tan Premier League, League Cup leh  FA Cup a chawi vek hnuah Nations League nomawi a chawi leh bawk a, mahse FIFA-in 'expert' tia a kohte hmin turin a tawk chuang lo. 

Harry Kane-a'n season hman zawh takah Tottenham Hotspur tan match 40-a khelhah goal 24 a khung a, Champions League final an lut bawk. 

Mahse - tih a ngai! Kane hian nomawi chawi a nei lo a, City tan nomawi pathum chawia goal 25 khungtu Raheem Sterling leh Silva te an lan loh laia a lang hi 'mak' ti duh tan chuan thil mak a tling. Sergio Aguero-a'n season hman zawh takah City tan goal 32 ngawt a khung a, heti zat khung tur hian match 46 bak a mamawh lo - mahse, a tan hmun a awm chuang lo. 

Nomawi aṭang ringawta thlir chuan Riyad Mahrez tel lo chu sawi awm a ni. Mahse, Mahrez hi City-ah rinrawl a ni phak chiah lo a, Algeria tan AFCON nomawi chawi mah se tournament tluanin beisei a phak lo bawk.  

Tun dinhmunah chuan Liverpool defender Virgil van Dijk chu hming langsar ber a ni a, PFA Player of the Year hian he chawimawina hi a dawng a nih pawhin a mak lo ang. 

Dutch defender hian season hman zawh takah khan Champions League nomawi a chawi bakah Premier League-ah pahnihna a ni a, Liverpool tana a inlan hnuhnung match 64-ah tumahin an la bum lo! Liverpool-in league-ah goal 22 chiah an chhuah a, season hmasa European top six league-a goal chhuah tlem ber an ni - VVD ṭangkaizia sawi hmaih theih a ni lo. 

Season hmasaa Ajax tana season duhawm tak hmangtu defender Matthijs de Ligt leh midfielder Frenkie de Jong-te hming lang ve mah se chawimawina dawng tur meuh chuan rin an harsa. 

Lionel Messi-a'n match 50-a khelhah goal 51 a khung a, La Liga nomawi a chawi bawk. Mahse, Copa-ah Argentina chu pathumna a nihpui hram a, a duh ber Champions League nomawi a chawi lo bawk. 

Mimal thiamna ngawr ngawr aṭang chuan Messi-a'n dawng ni se a awm lohna a awm lo a, mahse an nomawi hlawhchhuah thlir tel a nih ṭhin avangin Argentina captain tan beisei a sang lo mai thei. Ronaldo-a'n Juventus tan match 43-ah goal 28 a khung a, Serie A nomawi an chawi bawk. Mahse, Serie A ai mah chuan UEFA Nations League nomawi a chawi kha Ronaldo buk ti rit zawk tur niin a lang. 

Mimal thiamna aṭanga tehin Eden Hazard-a'n chawimawina dawn phu mah se a nomawi chawi Europa League hi a 'nau' hret tiin a sawi theih a, 'Best' nihpui turin a tlin tawk a rinawm lo. 

Best FIFA Football Awards hi September 23-ah sem chhuah tur a ni a, Milan khawpuiin a thleng ang. Player 10 thlanchhuah aṭang hian pathumah tih hniam leh tur a ni.

National team captain, national team coach, media thlan bik leh fan-ten lawmman dawng tur hi an thlang thei dawn a, 25% ṭheuh an vote hian a keng ang. Fans vote thlak duh tan FIFA website-ah vote thlak theih a ni a, footballer leh coach ṭha tih zawng thlang chhuakin a vote theih.