Hamilton tan Schumacher nihrual theihna hun

Tunkar tawp hian Hungarian Grand Prix tlan a ni dawn a, kar hmasa lama beisei phak lo Lewis Hamilton tan legend Michael Schumacher nihrual theihna hun a inhawng dawn - inelna dang zawng aiin a ngaipawimawh a nih pawhin a mak lo ang.

Hungarian GP-ah hian vawi sarih world champion ni thei Schumacher khan vawi sarih pole position a chang a, Hamilton-a'n tun qualifier-ah hian tlan ṭhain a hmasa bera aṭanga inelna hmachhawn tura a tling a nih chuan a vawi sarih nan 'pole' a chang ve chiah dawn a ni.

Mercedes driver Hamil­ton chuan, "Kei chuan record hi ka ngaihtuah ber a ni ngai lo a, inelna ka hmachhawn dawn reng rengin a ṭha thei ang bera tlan ka tum ziah. Hnehna changa kan tlan ṭha a nih chuan amahin record hi chu a rawn kal chawp ve mai.

"Schumacher hi driver ropui chungchuang bik a ni a, ani nena eng emaw zawnga khaikhin leh sawikawp ka ni ṭhin hi ka tan chuan chawimawina pawh a tling. Vawi li hnehna ka chan tawhna hmun a nih avangin Hungary hi ka tan chuan a hluin inrintawkna pawh ka nei sang," a ti.