Hun harsa ka paltlang - Osaka

Naomi Osaka chuan tun hnaiah hun harsa a paltlang thu a sawi a, kum tira Australian Open nomawi a chawi hnu lawkah phei kha chuan tennis khelh nuam tihna a neih vak loh hial thu a sawi tel bawk.

Kum 21 mi Osaka hian January thla khan Melbourne Park-ah hlawh­tlinna a chang a, season hmasa lama US Open title a lak nen a zawnin Grand Slam nomawi a chawi thei hial. Mahse, Australian Open hnu lawkah coach Sascha Bajin nen an inṭhen a, a hnu lamah final thlen a la nei leh lo. Hliam vangin Stuttgart Open leh Italian Open aṭanga a inhnuhdawh bakah, inelna lian French Open leh Wimbledon-ah te beisei a phak lo hle.

Japanese nula Osaka chuan, "Tun hnaiah hun harsa tak ka tawng ve a, nun ka hman tawh zinga hautak leh harsa ber pawh a ni hial ang. Mimal buaina neih hi midang hrilha sawi vak nuam ka tih zawng a ni lo, mahse tennis court chhunga result ṭha lo ka neih chhan langsar a nih avangin thup reng theih a ni lo.

"Chona thar hma­chhawn ka chak leh tawh, US lamah hard court inelna hmachhawn turin ka inbuatsaih leh ṭan tawh a, tunah chuan beiseina nen a sang thei ang bera season khar turin rilru ka siam," a ti. French Open leh Wimbledon lama beisei phak lo Osaka hi world ranking-ah pakhatna aṭangin pahnihnah a tlahniam mek rih a, US lamah a chefuh a nih erawh chuan a sang bera awm chungin season a khar thei tura ngaih a ni.