Aizawl FC leh East Bengal an chak lo

Aizawl FC-in tun season I League-ah an mualah chak an la nei lo a, February 1, Inrinni khan chak ngei an inbeisei laiin Real Kashmir lakah an chak loh hmasak ber an tawng. Kolkata club lian East Bengal pawhin an mualah table mawngphaha awm Indian Arrows an hneh lo.

RG Stadium, Mualpuiah Real Kashmir-in Kallum Higginbotham hmangin minute 17-naah hma an hruai a, mikhual team hian Mason Robertson hmangin minute 82-naah an khung belh a, Aizawl FC lakah 2-0 in an chak. Kalyani Stadium-ah Indian Arrows tan Vikram Pratap Singh-a'n minute 59-naah goal awmchhun a khung a, East Bengal-in Indian Arrows keeper Lalbiakhlua Jongte venah goal an khung thei lo.

East Bengal hian February 7, Zirtawpni hian Kalyani Stadium-ah Mizo club Aizawl FC an mikhual dawn a, Indian Arrows nena hnawhchhuah Spanish forward Marcos chu Kolkata club-in an chhawr thei lo ang.

Standly Rosario-a'n a sawi lawk ang ngeiin foreigner panga a luhtir a, defence laiah Juuko Richard Kassaga leh Joseph Adjei te an inkawp a, midfield-ah captain Alfred Kemah Jaryan leh Matias Veron te awmin tlarhmaah Abdoulaye Kanoute a awm thung.

Chhinga Veng aṭanga lakluh centre back Lalthlahlova (Patea) chu left back atan hman a ni a, right back-ah Joe Zoherliana a awm. Mual sir aṭanga nawr turin Rochharzela leh Ramhlunchhunga te an awm a, William Lalnunfela chu striker Kanoute thlawp turin dah a ni a. Goalkeeper pathum zingah Lalremruata chu khelhna hun pek a ni.

Aizawl FC-in foreinger panga bul an ṭantir avang leh bench-ah Justin Morgan an la dah bawk avangin ṭum dang aiin an ṭha zawkah a ngaih theih.

Amaherawhchu an khelh dan thlirin MPL-a an khelh dan an pha lo a, Mizo club inkhel a nung lo. Foreigner panga awmna Aizawl FC hi Real Kashmir tlarhnungin an dang chat hneh hle.

Argentine midfielder Veron-a'n ball a thiam tih hmuh theih mah se a pawimawh ber tharum a nei lo a, goal hmasa ber luhnaah pawh mawh a phur. AFC midfielder hi Real Kashmir midfielder pa te Chesterpaul Lyngdoh-a'n a tauh khalh a, Mason Robertson leh Kallum Higginbotham te inkawpin AFC tlarhnung pathum Kassaga, Joseph leh Patea te an ṭhiat a, minute 17-naah Kallum-a'n goal hmahruai a khung.

First half-ah AFC-in siphurh sutna remchang an nei a, Veron-a ball pek ṭha zet chu Kanoute leh Chhara ten an inchuh buai avangin a lut lo. Mizo tlangval Lalhmangaihsanga Ralte (Sena Ralte) awmna Real Kashmir tlarhnung a khawng ṭha a, Aizawl FC-in tih ngaihna tak an hre lo a ni ber.

Justice Morgan luh hnuah Aizawl FC goal nawr a na hret a, Nigerian forward freekick pet chu hnai tak aṭangin Kassaga-a'n a pet hman lo. Hemi hnu hian Justice-a'n cross ball ṭha tak nei lehin Kassaga-a'n goal zawnah tauh mah se keeper Phurba Tempa Lachenpa-a'n a dang. 

Hun tawp lama khel ṭha ber Justice a chesual zui a, ball a lak sual chu Real Kashmir-in nawr let nan hmangin Mason Robertson-a'n minute 82-naah chak nemghehna goal a khung. Real Kashmir coach David Robertson-a fapa Mason hi man of the match-ah thlan a ni a, chak phu zawk an chak.

Real Kashmir coach David Robertson chuan, "Kan khel 

ṭha zawk a, chak kan phu zawk. Point hlawhchhuah harna RG Stadium-a hnehna kan chang hi kan lawm hle. Kan team-in Sena kan chang thei hi kan lawm a, kan mamawh tak player a nih tih a khelh dan aṭangin a lang. Mual vei lam aṭangin kan goal nawr a na a, a rawn awm hma khan hetiang ti thei hi kan nei lo," tiin loan hmanga ATK aṭanga an lak Sena Ralte a fak.

Aizawl FC coach Standly Rosario chuan, "Kan khel ṭha lo tih ka pawm thlap. Chutihrualin season ṭantirh aṭangin a hu  hoin training kan nei thei lo a, player thar an rawn awm  belh zel avangin kan khelh dan tur kan la bel lo," tiin chak an phu loh thu a sawi.

Inkhel tawp lamah Aizawl FC supporter ṭhenkhat 'Standly Out' tiin an au a, an result-ah an lawm lo. AFC coach Standly Rosario chuan, "Jose Mourinho pawhin result a neih ṭhat loh chuan Jose Out an ti tho a, professional coach nih chuan kan hmachhawn a ngai," tiin football-ah chuan thil thleng pangngai a nih thu a sawi.

Aizawl FC hian East Bengal an hmachhawn zui dawn avangin hmabak a hautak dawn a, Kolkata club hi Indian Arrows hneh lo zo chiah ni mah se tum châkawm lo ber zinga mi an ni. Red and Gold-ah hian Lalrindika Ralte, Brandon Vanlalremdika, Lalthuammawia Ralte, PC Rohlupuia leh Edmund Lalrindika te an awm. Bengaluru aṭanga loan hmanga Kolkata club pantu Edmund hi hliam vangin a chawl rih.

AFC coach Standly chuan, "Aizawl FC dinhmun hi ka la thlak danglam leh theih ka ring tlat. Season liam ta khan tla thei dinhmuna an din hnuah ka chhan chhuak a, tun season-ah pawh result ṭha tak nen season kan khar thei ang. Mizo club-in result ṭha an neih theih nan theihtawp ka chhuah dawn," tiin Vanglaini a hrilh.