Team talbuai Liverpool hmaah harhna chang City

Premier League ngainatute tan Pathianni zanah men rei a ngai dawn - Liverpool chuan zan dar 10:00-ah Manchester City an mikhual dawn a, a hmuhnawm loh ring suh. 

Season ṭan dawn khan Premier League nomawi inchuh tura rin hlawh chu Liverpool leh City an ni a, team pahnih hi tunah erawh an dinhmun a inthlau hle - City hian table chung ber an luah mek a, Reds-in match khata khel tam chungin point sarihin an thlau. 

Liverpool tan Pathianni zan inkhel tur hi a pawimawh lehzual a, an chak loh chuan nomawi humhim an tumna chu a thamral tawh angin a sawi theih ang. 

November 2019 kha Anfield-a league match khel tura City an len hnuhnung ber a ni a, 3-1 in an tlawm. Liverpool-in he result vang hian point kuain City an tlansan a, an champion zui - Pathianni zanah City hi an chak chuan point 10-in Liverpool an tlansan dawn. 

Premier League club-ten lenluh an chak lohna ber chu Anfield a ni ṭhin tia sawi ngam a ni a, league match 68 chhung zet chu he khelmualah hian eng team mahin hnehna hlado an chham thei lo.

Mahse, January 21 zan khan thil mak a thleng a, mak tak maiin Burnley chuan 1-0 in Liverpool an hneh a, league match 68 chhunga team dang tih theih loh kha he club 'tenau' hian an rawn ti. 

Liverpool hian Anfield-a Burnley an ngam loh hma hian West Bromwich Albion leh Manchester United chu an khelmual hmanthiamah vek hian an lo draw tawh bawk a, khelmual ṭihbaiawm kha a in 'hawng' thar thut. 

Burnley pawhin an hneh theih team hi tun hnaia insiam thar Brighton & Hove Albion pawhin ngam loh an duh bik lo a, Nilaini zan khan 1-0 in an hneh ve leh ngat - Anfield a nghing. 

Liverpool an talbuai a, an khelh ṭhat loh pawha an chakna hmun ni ṭhin Anfield-ah kum 2021 chhungin chak an nei ta lo a, hetihlai hian Pathianni zana an mikhual tur City erawh an chak tluang em em  thung. 

Premier League match kua zet chu City hi a zawnin an chak tawh a, match ruk zet chu a zawnin an lamah goal a lut tawh lo bawk - season ṭantir lama talbuai City an insiamṭha a, champion tura rinkai ber an ni leh ta. 

Liverpool tana thu hriat nuam tur chu Kevin De Bruyne inhliam hi a ni a, Belgian midfielder thiam bik hi Pathianni zanah a inlan theih a la rinawm loh a, Sergio Aguero chu chhawr ngam a nih a la rinawm lo bawk. 

Mahse, Reds tan lungmuang taka awm erawh a fuh lo ang tih hriat a ṭha a, Anfield hre chiang sa Raheem Sterling hian City tan goal khung a la bansan lo - league match hnuhnung pahniha goal khungtu Gabriel Jesus a la awm cheu tih hriat tel a ṭha. 

Brighton an hneh loh hnu lawkah Liverpool defender Andy Robertson chuan champion thei zinga an tel loh thu a sawi a, City dinhmun ṭhatzia a sawi lang bawk - Pep Guardiola leh a naute pressure pek a tum a ni. 

Mahse, Spanish coach hi ṭum dang ang thoin a 'cool' tlat a, a ṭawng pawr duh lo. Pep chuan, "Liverpool hi champion thei zingah an tel a, mahse, anni nena kan inkhel tur hi match dang ang thoin point thum inchuhna inkhel a ni," a ti. 

Barcelona boss hlui hian club tenau an hmachhawn ang thoin Liverpool-in point thum aia tam an ken bik loh thu a sawi hi pressure vai kian a tumna a ni tih a chiang a, Reds nena an inkhel tur hi team dang nen angkhata en chi a ni lo tih chu a hrechiangtu a ni. 

City hian Liverpool hi an hneh thei a nih ngat chuan an hmabaka Swansea (FA Cup), Tottenham Hotspur, Everton, Arsenal, Borussia M'Gladbach (Champions League), West Ham leh Manchester United-te inringtawk zawkin an hmachhawn thei ang. 

Reds tan Virgil van Dijk, Joe Gomez, Joel Matip, Naby Keita leh Diogo Jota chu inlan thei lo chiang an ni a, Brighton hmachhawn thei lo forward Sadio Mane leh keeper Alisson Becker-te an rawn kir tawh a beiseiawm thung. 

Klopp-a'n Brighton an hneh loh hnuah, "City-in sang tak an thlen lai a ni a, kan insiamṭhat a ngai a ni," tiin an hmaa hna hautak inchhawp a thlir a, Pathianni zanah an insiamṭhat leh ṭhat loh a hriat dawn. 

Liverpool tana pawimawh ber erawh Fabinho a dam leh tawh nia sawi a awm hi a ni a, Brazilian midfielder hi a dam chuan tlarhnung laiah captain Jordan Henderson nen an inkawp thei ang. 

Hendo tan tawnhriat nei tam lo Nathaniel Phillips kawp ai chuan Fabinho kawp hi a hahdamthlak deuh zawk ang tih a chiang a, Liverpool fans pawh an ngaih a ṭha sawt tura ngaih a ni.