Tuchel 'Chelsea'-in Mourinho 'Spurs' an hneh

Frank Lampard bantu Chelsea-in manager thar Thomas Tuchel hnuaiah harhtharna an chang chho zel a, Ningani zan khan Jose Mourinho kaihhruai Tottenham Hotspur 1-0 in an hneh.

Blues hian Tuchel hnuaiah hneh loh an la tawng lo a, Premier League-ah paruknaah an inhlangkai. Spurs hi match hnuhnung pathuma an chak loh vek avangin point 33 hmuin pariatnaah an awm a, an hmelma Arsenal aia an sanna pawh point hnih chauh a ni ta.

Tottenham hian Pathianni zan dar 5:30-ah relegation zone-a awm West Brom an mikhual ang a, Chelsea hian hemi zan dar 12:45-ah hian table mawngphaha awm Sheffield United an lenchilh ang.

Tottenham Hotspur Stadium-ah goal khat chiah a lut a, minute 24-naah Jorginho-a'n penalty aṭangin chakna goal hi a khung. Tottenham defender Eric Dier chuan box chhungah ṭul lo takin Timo Werner a ti tlu a, referee Andre Marriner-a'n penalty pek mai loh chu tih theih dang a nei lo.

Inkhelh banah Mourinho chuan, "Andre Marriner hi referee ṭha tak a ni a, ka beisei san avangin ka sawisel a ni. Ṭum dang angin a ham ṭha lo. Penalty pawm thiam a har a, kan chak loh dan a na hle," tiin penalty a sawisel a, thil thlen dan hmutu erawhin Portuguese manager hi an thlawp kher lo ang.

Team pahnih dai dantu chu penalty a ni a, amaherawhchu point thum hlawh chhuaktu Chelsea an khel ṭha zawk hrim hrim. Thomas Tuchel-a'n Spurs an hneh theih nan game plan a duang fuh a, chak phu zawk an ni.

Harry Kane tel lohna Spurs goal bawh a na tawk lo a, Blues defender-ten hun tam zawk Brazilian forward Carlos Vinícius an dah ṭha a, Son Heung-min-a'n season tir a pha ta lo bawk.

Chelsea tlarhnunga Antonio Rudiger, Thiago Silva leh Cesar Azpilicueta inkawpten an tihtur an hre chiang a, inhliam vanga Silva thlaktu Andreas Christensen pawh a khel ṭha. 

Mual sir aṭangin Marcos Alonso leh Reece James ten zalen takin an nawr. Tuchel-a'n season ṭantirha Blues sum hman tamna Ben Chillwell leh Hakim Ziyech te bench-a ṭhut tluantir a hreh lo a, Kai Havertz pawh dam ta reng se academy chhuak Mason Mount nek chhuah a harsat ang.

Timo Werner a la thawkrim reng a, penalty hlawh chhuak mah se goal hmaah a vannei lo. Chelsea boss Tuchel chuan, "Kan lawm takzet. Team ṭha tak lakah inkhel thunun chungin kan chak a ni. Second half-ah ball kan hloh tam a, tla hniam hret mah ila inkhel pumpui thlirin kan khelh danah ka lungawi hle," tiin a sawi.

Thomas Tuchel-a'n a player neih ang te a thlak kual nasa a, team chhung boruak a ṭha sawtah a ngaih theih. Chutihrualin Thiago Silva inhliam chu German manager tan chanchin hriat nuam a ni lo ang. Blues hian Tuchel-a hnuaia match hmasa pathumah goal an chhuah lo!

Spurs forward Carlos Vinicius-a'n hun tawp dawn hnaiah Serge Aurier cross ṭha zet chu goal zawnah a tauh thei lo a, goal-ah chantir zawk se inkhel an thlir zui dan a dang daih ang. Jose Mourinho chuan, "Player ṭha tam tak kan chan a, chutihrualin second half-a kan rilru put hmang erawh a ṭha thlawt. Karleh lamah chuan Harry Kane kan chawr theih ka beisei," tiin a sawi.