Djokovic leh Serena hmabak a hautak

Australian Open 2021 chu February 8, Thawhṭanni aṭangin khelh ṭan a ni dawn. Nimin khan inkhel tur pawh fel a ni a, champion lai Novak Djokovic leh Grand Slam title 24-na beiseitu Serena Williams ten kawng hautak an zawh a ngai dawn.

Coronavirus vangin inelna hi January thla a khelh tur ni mah se a hun an sawn. Tun hnaiah hrileng vang hian buaina nei zauh mah se tournament director Craig Tiley-a'n a lo sawilawk tawh angin a hun hi an sawn nawn ta lo.

Tennis player hrang hrangin inkhelh thiamna hmun bik an nei. Djokovic tan chuan Melbourne Park hi hmun rangkachak a ni a, kuminah hian a vawi kua nan champion a tum dawn - seeded pakhatna pek niin match hmasa berah Jeremy Chardy a hmachhawn ang.

Serbian tlangval kalkawngah hian Alexander Zverev, Gael Monfils, Milos Raonic leh Stan Wawrinka te an awm thei dawn, an khelh fuh ni chuan Djokovic tan chetsual theihna vek an ni dawn.

Season hmasa Australian Open final-ah Djokovic hian Dominic Thiem a hneh, kuminah player pahnih hi an kaltluang a nih chuan semifinal-ah an inhmachhawn a ngai ang. Austrian tlangval hi US Open champion lai a nih avangin Novak tan hmachhawn châkawm loh ber pawl a ni.

Roger Federer chu a khup na a la dam chian loh avangin a inlan thei dawn lo, amah ang bawka Grand Slam nomawi 20 chawi tawh Rafael Nadal erawh a inlan thei dawn - Spanish tlangval tan major title la hnem ber record siam theihna hun a ni dawn.

World number 2 Nadal hian a match hmasa berah Laslo Djere a hmachhawn ang. A kaltluang a nih chuan Nadal-a'n quarterfinal-ah Stefanos Tsitsipas a hmachawn thei dawn, Greek tlangval hi 2019 semifinal-ah khan a lo hneh tawh.

Kum 34 mi Nadal tan record siam theihna hun ṭha a ni dawn a, chutih rualin Melbourne Park-ah hian vawi khat chiah hlawhtlinna a la chang. Tournament tir lama a hmachhawn theih zinga mi Dan Evans, Ilya Ivashka leh Roman Safiullin te chu harsa vak loin a paltlang tura ngaih a ni.

World number 1 hlui Serena-i'n Australian Open nomawi a la a nih chuan, major title lak hnem lamah Margaret Court-i record (24 titles) a nih rual thei dawn, champion tur erawhin a hmabak a hautak dawn hle.

American star hian Gearman player Laura Siegemund aṭangin bul a ṭan dawn. A kalkawngah Simona Halep, Naomi Osaka leh Ashleigh Barty te an awm thei dawn, world number 1 Barty hi a tlang lo a nih pawhin champion lai Sofia Kenin te nen an kawng a inang.

Kum 39 mi Serena hian Australian Open hi a vawi 20 khelhna tur a ni a, vawi sarih a champion tawh. Hard court hi a inkhelh thiamna hmun a nih avangin a khelh tluan ṭum chuan player ṭha dang zawng zawng paltlang turin a ṭha tawk.

US Open champion Thiem-a'n first round-ah Mikhail Kukushkin a hmachhawn dawn. Seeded pathumna hian hard court a khelh Grand Slam-ah a zawna champion a tum dawn, vanglai hmang mek a nih avangin champion tura rinkai a ni phak.

Seeded palina Daniil Medvedev pawh sawi hmaih theih a ni lo. Russian tlangval hi hard court chunga inkhel thiam chungchuang a ni, tunah hian match 12 chhung tlawm nei loin a kaltluang mek - a bul ṭanna tur chu Swiss tlangval Vasek Pospisil a ni ang.

Medvedev bakah hian Stefanos Tsitsipas, Alexander Zverev leh Andrey Rublev ten an major title hmasa ber an beisei dawn. Player ṭha sa Nadal leh Djokovic te karah an rawn chawr chhuak thei ang ngem tih chu fiah a ni dawn.