Leno aiawh tur an la chiang lo

Arsenal leh Wolves inkhelh ṭumin defender David Luiz leh Bernd Leno te hnawhchhuah an ni a, zanina Aston Villa an tlawh hunah keeper Leno hmunruak luah tur zawk a la chiang lo.

Gunners hian thlasik bazar lai khan keeper Mat Ryan an lalut a, mahse Australian keeper hian training a la zawm mumal lo - besei phak lo Runar Alex Runarsson erawh inkhel turin a inpeih thung.

Arsenal manager Mikel Arteta chuan, "Mat-a'n training a la nei mumal lo, ani a inpeih loh chuan Alex a awm. Mat leh Alex an inpeih ve ve a nih chuan lut tur zawk kan thlang ang, Mat a inpeih lo a nih chuan Alex zawk a lut ang," tiin a sawi.

Wolves laka hnawhchhuah Luiz erawh Villa lakah an chhawr thei dawn lo. Brazilian defender red card hi FA hnenah hnukkir turin ngen mah se an dilna hi an hnawl. Rob Holding kiangah Gabriel a inlan a rinawm.

North London club tan captain Pierre-Emerick Aubameyang chu inkhel bul ṭan turin a inpeih leh tawh. Defender pawimawh Kieran Tierney erawh a hliam a la dam fel lo a, Arteta chuan a player in ngai a awh leh theih nan theihtawp an chhuahpui tur thu a sawi.

Villa Park-ah Arsenal hi rinkai zawk an ni ngawt dawn bik lo. Dean Smith-a naute hian Premier League match 20 aṭangin point 32 an hmu, match 22 aṭanga point 31 nei Gunners chungah an awm mek. Captain Jack Grealish hoin point thum hmuh an tum leh ang.