Khalid-a Highlander an sang zel

Aizawl FC boss hlui Khalid Jamil-a'n NorthEast United-a enkawl hnuah tlawm an la nei lo - league match thum chhung a zawna hnehna an chan hnuin NorthEast United chuan 2-2 in FC Goa an inhnehtawkpui a, playoff khelh an beiseina chu an chhem nung zel. 

FC Goa tan Alexander Jesuraj chuan minute 20-naah goal hmahruai a khung a, mahse, Highlander-in si phurh sut turin hun erawh an duh rei lo - minute 41-naah Goa midfielder Alberto Noguera chu Luis Machado lakah a foul a, penalty an chawi. 

Highlander tan Federico Gallego a rawn pen chhuak a, 'The King of Northeast' hminglem an pek midfielder hian harsatna nei loin goal-ah a chantir. 

Mahse, Goa-in tlawm an tum lo. Minute 80-naah an goal hnihna an rawn khung. FC Goa midfielder Jorge Ortiz-a corner pet chu Amarjit Singh chuan tauh luh a tum a, NorthEast tan defender Gurjinder Kumar chuan lo dang hman mah se dang pialin goal-ah a lut. 

Gaurs (FC Goa sawina) goal khung hun ngaihtuahin an chak mai dawn niin a lang hman a, mahse, Highlander lamin ngaihdan dang an nei thung. Goal hnihna an chhuah aṭanga minute thum hnu lawkah Aizawl FC defender hlui Ashutosh Mehta chu Ivan Gonzalez chuan a ti tlu a, penalty a chawi. 

Highlander tan Gallego bawk a lo pen chhuak a, a tisual lo - Goa keeper duhawm Dheeraj Singh chuan a kutin khawih thawi mah se a dang thei lo a, 2-2 a ni. 

Minute hnih hnu lawkah Goa tan Ortiz chuan hun duhawm nei leh mah se crossbar a tih per a, hun tawp thlenga goal dang lut tawh loin team pahnih an inhnehtawk. 

NorthEast United tan Lalengmawia (Apuia) chuan inkhel bul a ṭan a, Vaivakawn rawlthar hi coach Khalid Jamil chuan, "India rama midfielder ṭha ber pawl a ni a, a tih tur ka hrilh ngai lo. 

"Match tinah hian a phurna leh thiamna ngai rengin a khel thei. Ka inkhelh ve lai pawhin ani ang player hi ka hmu ngai lo. Kan player ṭha ber pawl niin ka hria," tiin a lo fak tawh a, Apuia'n Khalid-a hnuaiah hmun pawimawh a chan chhoh zel a rinawm hle.