Messi chungah Mbappe a innghat!

Spanish chanchinbu lar Marca chuan nipui transfer-a Kylian Mbappe-a'n Paris Saint-Germain a chhuahsan leh chhuahsan loh chu Lionel Messi kutah a innghah thu an tarlang. 

Messi hi nipui transfer-ah a contract-a zo dawn a, Spanish journalist lar Jordi Évole nen an inkawmnaah a hma hun chu nipuiah a sawi chian tur thu a sawi tawh. 

Hetihlai hian Spanish chanchinbu El Mundo chuan tun hnai khan Barca-a Messi contract an pholang a, mi tam tak chuan suma talbuai mek Catalan club hian fans laka thiam chan nan an ti put ruah an ngai. 

Chumi awmzia chu Messi hi chhuak pawh ni se, fan-ten a hlawh a tam em avangin club an dem lo ang - chutihrual chuan Messi hlawh ang pe thei tura ngaih chu PSG leh Manchester City chiah an awm. 

PSG hian Messi an lalut dawn a nih chuan Neymar leh  Kylian Mbappe-te nen financial fair play rule vang ringawt pawhin an kawl ho theih a rinawm loh a, Mbappe hi an chhuahtir dawn niin an sawi. 

French club hian Messi an lalut thei lo a nih erawh chuan Mbappe chhuahtir tumna erawh an nei lo a, hetihrual hian Real Madrid leh Liverpool chuan French forward hi lak theih beiseiin an thlir reng niin Marca chuan a tarlang. 

Messi hi City chuan an thlithlai reng bawk a, anni hian MLS-a khelh a chak thu sawi tawh player hi MLS club New York City-ah a hun tawp lam hmantir an tiam tel bawk. 

Argentine forward khelhna Barca hian tun season-ah beisei an phak lo a, league-ah pahnihna ni mah se hmahruaitu Atletico Madrid chu match khata khel tam chungin point sawmin an phak lo mek. 

Catalan club hian Pathianni zan dar 1:30-ah league match khel turin Real Betis an lenchilh dawn a, anmahni ang thoa match 20-a point 40 nei Real Madrid chuan zanin dar 8:45 hian Huesca an lenchilh dawn thung.