Germany-in Musiala an duh

Germany coach Joachim Low chuan Bayern Munich midfielder Jamal Musiala chu Die Mannschaft tana khelhtir tumin hma a la mek. Kum 17 mi Musiala hi England Under 21 tan a khel mek a, senior team-ah England leh Germany tan a la khel thei a ni.

Musiala hi Stuttgart, Germany-ah a piang a, a pa hi British-Nigerian niin a nu hi German a ni thung. Chelsea academy-ah Musiala hi kum riat chhung a awm a, July 2019 khan Bayern Munich a zawm. England tan U15, U16, U17 leh U21-ah a khel tawh a, Germany tan U16-ah a khel tawh bawk.

German football expert Raphael Honigstein chuan, "Germany chuan senior team-a khelhtir ngei tumin hma an la mek. England leh Germany-ah a duh zawk a thlang thei. Munich-ah Low-a'n a hmu tawh a, Germany tana khelhtir a tum ruh hle.

"Musiala nu hian Germany FA hnenah youth team-ah chuan a team khelhna a thlak tawh loh tur thu a sawi. Thutlukna a siam a nih chuan senior team a ni tawh dawn. Germany-in thutlukna an siam ran a ṭul a, England pawhin an ngaihven a ngai," tiin a sawi.

Musiala hi nikum September thla khan Bayern Munich tan a inlan ṭan a, Schalke 8-0 a an sawp ṭumin goal a khung. Bundesliga-ah vawi 16 a khel tawh a, match hnihah bul a ṭan. 

Champions League-ah pawh vawi thum a inlan tawh. Germany leh Bayern Munich captain Manuel Neuer pawhin, "Musiala hi kan team tana ṭha tur player a ni a, Germany tana khel tura hmalak a ṭul a ni," tiin a lo a sawi tawh a ni.

Germany hian Musiala khelhna position-ah Joshua Kimmich kawl mah se a thlakna tur player naupang ṭha an nei mai lo. Musiala hi nakina Kimmich thlak thei tur a ni a, Germany tan an chan ngei a ṭul. Chutihrualin hriat tel atana ṭha erawh Musiala hian a duh a thlang a, ram tana a inlan tawh chuan thutlukna a thlak thei tawh lo.

Germany leh England te hian March thla tawpah World Cup qualifier match thum ve ve an khel dawn a, hemi hunah hian Musiala hmalam hun a chiang thei ang.