Ighalo-a'n Saudi Arabian club a zawm

Manchester United-in Shanghai Shenhua aṭanga loan hmanga an hawh Odion Ighalo chuan Saudi Arabian club Al Shabab a zawm a, kum hnih leh a chanve atan contract a ziak.

Kum 31 mi Ighalo hian Udinese, Granada leh Watford tana a khelh hnuah Chinese Super League club Changchun Yatai a zawm a, heta ṭang hian Shanghai Shenhua a zawm.

Manchester United-in goal khung tur player an mamawh avangin Nigerian striker-in khawvel hmuha a theihna phochhuah hun ṭha a nei nawn a, January 2020 khan Old Trafford a pan.

Ighalo hian a hlawh ti hniamin a club ṭan Manchester United tan a khel a, season hmasa berah match 19 khelin goal nga a khung. Ole Gunnar Solskjaer hnuaiah hming a chher avangin a loan hun pawhseisak a ni a, tun season-ah erawh inelna hrang hrangah match li lek khelin goal a khung lo.

English club tana Ighalo hun tawp a ṭha tawk lo a, January thla khan a loan hun zoin Shanghai Shenhua-ah a let. Amaherawhchu Nigerian striker hian Chinese club chhuahsan turin thulukna a siam a, MLS club zawm tumin sawi ni mah se Saudi Arabian club Al Shabab a zawm ta zawk. 

Al-Shabab hi Saudi Professional League-ah hmahruaitu an ni mek a, champion theihna hun ṭha hi an hman ṭangkai theih nan Ighalo a ni. Al-Shabab-ah hian Agentine midfielder Ever Banega leh Watford tana khel tawh ṭhin Alfred N'Diaye te an awm sa a ni.