Pasalṭha ngamtu Armed Veng an champion

Tualchhung taekwondo inelna ngaihhlut leh lian ber GIG Motors Taekwondo Fight League chu Ningani zan khan a hmawr bawkna neih a ni a, champion lai Armed Veng Warriors chuan an ṭhenawm Armed Veng South Pasalṭha chu 142-138 a hnehin nomawi an humhim.

TFL hi vawi thum neihna a ni a, a hmasa berah Ramhlun Sporting Club an champion. A hnuhunung pahnihah erawh Armed  Veng an chungnung ber, chuh buaitu nei loin tualchhung taekwondo roreltu an ni rih.

GIG Motors Taekwondo Fight League-ah team panga an inlan a, a tirah league round neih a ni a, an inkhel kual hmasa vek. An intawn hmasakah Pasalṭha lamin point hnihin hnehna an chang a, hneh loh nei loa table chung luahtu an nih avangin champion tura rinkai an ni.

Mahse, Electric Veng YMA Hall-a nomawi inchuhna inkhel boruak a danglam. Armed Vengin a tir aṭanga round lina thleng mahni inveng fimkhur tak chhungin an khel ṭha zawk. Armed Veng South-in ruahmanna an siam fuh lo deuh, round hnuhnung berah na takin nawr mah se an dinhmun hniam sa thawh chhuah nan a tawk lo.

Derby boruak sang tak karah Ch Yaikhamba Meitei chuan a khel ṭha, round lina a zawh thlengin hma an hruai fal. Mahse, round nganaah Warriors an bet zawk a, hun khirh an hman laiin state pawn aṭanga an lak Manipur player Yaikhamba hian Armed Veng South captain H. Vanlalfela luah pet sakin danglamna siamtu pawimawh tak a ni, Fighter of the Night lawmman a dawng zui bawk.

Tun season-ah a vawi khat nan Cadet inelna buatsaih a ni a, Zopa Goldsmith Chawnpui chuan final-ah 155-120 in St Joseph Higher Secondary School, Ramhlun Sporting Club Fighters hnehin an champion.

Chawnpui rawlthar rualin league-ah 143-113 in RSC an hneh tawh a, inringtawk leh ngampa takin an inlan. A tir round li an khelh chhungin an dinhmun an siam fel a, a hma aia chiang zawkin St Joseph HSS team lakah an chak nawn.