Arsenal player manto ber Pepe

Nicolas Pepe chuan pound maktaduai 72 zetin Arsenal a zawm fel ta a, Ivory Coast international hi Gunners player neih tawh zinga manto ber a ni - English club tan hian season nga daih contract a ziak.

Kum 24 mi Pepe hian Ligue 1 club Lille tan match 74 a khelhah goal 35 a khungsak a, season hmasa khan a club hi league-ah pahnihna nihpuiin an chungah hian sum hmang hnem Paris Saint-Germain chiah an awm.

Premier League player awm tawh zingah Pepe hi a manto palina ni nghalin ani aia manto chu Manchester United duo Paul Pogba (£89m) leh Romelu Lukaku (£75m) te bakah Liverpool defender Virgil van Dijk (£75m) chiah an ni.

Pepe chuan, "Hun harsa leh hrehawm tam tak ka lo paltlang ve tawh ṭhin a, vawiina hetiang hun ka tawng ve thei ta hi ka lawm hle. Hmasawn tur chuan thutlukna siam dik a ngai a, ka ngaihdan chuan Arsenal hi ka tana duhthlan tur dik a ni," tiin a sawi.

Season hmasa khan Pepe-a'n league-ah goal 22 a khung bakah ṭhiante thun tur vawi 11 a siamsak, goal khung leh assist ngah lama a tluk loh chu Paris Saint-Germain duhlai Kylian Mbappe chauh a ni. Gunners boss Unai Emery chuan, "Nicolas hi winger theihna nei sang leh ṭha bik a nih avangin Europe club lian dang pawhin an hnena khel turin an duh, chutiang boruak kara kan club min rawn zawm hi a lawmawm.

"Tun nipui bazar chhunga kan thupui pakhat chu winger ṭha neih a ni a, kan mamawh leh duh tak chu kan nei. Tharum a ngahin a che rang a, goal hmaa hlauhawm tak a nih bawk avangin team-in goal tam zawk kan khung theih nan a pawimawh ngei ka beisei," a ti.

Ningani zan tho khan Pepe hma deuhin Lille hian Portugal Under 21 forward Rafael Leao chu AC Milan-ah pound maktaduai 27-in an kaltir tawh bawk a, tun nipui chhung hian Thiago Mendes (£19.8m) leh Youssouf Kone (£8.1m) te an chhuahtir tawh bawk avangin, player hralhna aṭangin pound maktaduai 135 bawr an hmu tawh a ni.