Community Shield Nomawi hmaah Liverpool vs City

Premier League season thara inum leh ber tura ngaih chu Liverpool leh Manchester City an ni a, English football ngainatuten an beisei aia hmain club pahnih inhmachhawn an hmu dawn. 

Pathianni zan dar 7:30-ah Community Shield khelh a ni dawn a, Liverpool leh City ten season bul ṭan nan nomawi chawi an tum dawn - inkhel a hmuhnawm ang. Reds boss Jurgen Klopp-a'n, "Final-a ni a, chak loh ka duh lo," tiin nomawi nena season bul ṭan a tum thu a sawi a, German coach ṭawngkam hi inkhel ti nghahhlelhawm tu a ni. 

Community Shield hi Premier League champion leh FA Cup nomawi chawitu te inelna ni mah se season hmasaah City hian nomawi pahnih an chawi kawp a, league-a pahnihna Reds nen an inhmachhawn phah dawn. 

Liverpool-in season hmasa an hman ṭhat an chhawr a, inelna pasarihah an inlan dawn. Community Shield bakah hian Premier League, Champions League, FA Cup, League Cup, Club World Cup leh UEFA Super Cup-ah an inlan ang. 

Reds hi inelna an hmachhawn tur hoah an kaltluang vek a nih chuan ni 300 chhungin match 67-ah an inlan dawn tihna a ni a, chu chu ni 4.5-a match khat khel zel ang tihna a ni - inelna aṭang hian hma taka knockout an nih pawhin a tlem berah match 50 chu an khel ngei ngei dawn. 

Community Shield result hian thui takin nghawng a nei dawn tihna a ni a, nomawi nena bul an ṭan thei a nih ngat chuan Liverpool player-ten phur takin inelna hmabak an neih an thlir thei ang. Klopp chuan, "Match tam thei ang ber khelh kan duh - chutiang a nih chuan season duhawm tak kan hmang tihna a ni dawn a ni," tiin phur takin season a thlir. 

Liverpool-in pre-season an hmang ṭha lo a, an match hmasa pahnihah Tranmere Rovers (6-0) leh Bradford City (3-1) ngam mah se Borussia Dortmund (3-2), Sevilla (2-1), Sporting Lisbon (2-2) leh Napoli (3-0) lakah an chak zo lo vek. 

Mahse, Liverpool-in chhuanlam turin Alisson, Roberto Firmino, Mohamed Salah leh Sadio Mane an chhawr thei lo a, Mane tih loh zawng an kir hnuah 3-1 in Lyon an hneh zui. Pre-season result-in Liverpool a nghawng hlauhthawnawm lai takin player thiam bik danglamna a lo lang chhuak a, an team an chakpui nghal avangin Reds player-ten inrintawkna an nei sawt ang. 

Mane erawh AFCON final-a khelh avangin Liverpool squad a la zawm lo a, Manchester City lakah a la inlan thei rih dawn lo. 

Copa America nomawi chawi hlim Alisson-a'n a match hmasa berah a ngaihtuahna a la 'fresh' tawk lo tih pholangin holam takin a chesual a, Lyon lakah penalty a chawi. 

Firmino-a'n goal khung nghalin Mo Salah a khel chhe lo bawk - mahse player pathum hian minute 90 pawh khelmualah hun an la hman loh avangin City hmachhawn turin an inpeih nghal ang em, tih chu hriatthiam harsa a ni. 

Klopp chuan, "An khel lo ang tih tawpin ka sawi thei lo a, an khel ngei ngei ang tih pawh tiam theih a ni lo. Pre-season anga player thlak danglam chiam theih pawh a ni lo a, chuvangin fimkhur a ngai a ni," a ti. 

German coach chuan, "Mo hi chu a in fit reng mai a, nileng pawhin a tlan thei ang. Mo-a awm chuan football tak tak khel chhuak turin min pui ṭhin a, tlarhmaa Bobby a awm chuan a ngaihṭhat thlak ṭhin bawk," a ti zui a, player pahnih hi chu an lut ngei dawn niin a lang. 

City-in Liverpool angin pre-season-ah harsatna an tawk ve lo. Match li an khelhah vawi khat chiah an tlawm a, an tlawm chhun pawh penalty-ah a ni. 

Mahse, Leroy Sane chu Bayern Munich nen sawi zawm a nih reng avangin German winger chanchin hi team boruak ti chhe thei a ni a, he thu buatsaih thleng hi chuan thu thar a awm rih lo. City hian Sane manah pound maktaduai 137 an chhiar nia sawi a awm a, Pep Guardiola chuan Sane hi thutlukna siam vat turin a hrilh. 

Bayern Munich coach Nico Kovac chuan, "Pep nen phone-in kan inbia a, Sane ka duhna lamah ka chet uchuak deuh avangin ngaihdam ka dil a ni," a ti - City tan Sane inlan a rinawm lo. 

Manchester City hi kum 1880 khan St. Mark's (West Gorton) tiin din an ni a, mahse tuna an hming put lai nena an din kum tak chu 1894 kha a ni - kumin hi Manchester City tih hming pua kum 125 an dinna tihna a ni. 

Liverpool lakah pawh City hian kum 125 an tlin lawm nan jersey danglam bik an ha dawn a, kum 125 tlin lawm jersey nena tlawm hi thil inhmeh a ni dawn lo. City hian Liverpool ang lo takin transfer bazar lamah rilru an seng nasa leh tawh a, mahse season dang ang chuan Pep-a enkawl team hi an sum hman a na bik lo - hei tak hi inkhel ti nghahhlelhawm tu a ni. 

Citizens hian Atletico Madrid aṭangin Rodri chu pound maktaduai 62.8-in an lalut a, player dang an lakluh erawh pound maktaduai riat kai phak an awm lo. 

City leh Liverpool inkhel tur hian history a nei tam lo a, Liverpool vs Manchester United, Arsenal vs Tottenham Hotspur, Merseyside derby leh Manchester derby te nena khaikhin phei chuan boruak a inthlau ṭhin hle. 

Mahse, tun hnaiah khawvela coach ṭha ber pawl pahnih Pep leh Klopp inhmachhawnna a nih avang ringawt pawhin a boruak a 'hot' ṭan a, ngaihthah a thiang ta lo. Hei mai a ni lo - City nomawi duh ber Champions League kalkawng daltu chu Liverpool an ni a, 2017-18 quarterfinal-ah khan 5-1 in Reds hian an hnawt chhuak. 

Season hmasa Premier League-a Liverpool champion kalkawng daltu chu Manchester City an ni thung - he result pahnih hian team pahnih inkar boruak a ti sang thar a, Pathianni zanah inkhel hmuhnawm chhawp sak kan ni ang.