Sancho & Haaland record nen Dortmund chak

Inrinni zan Bundesliga inkhelah Jadon Sancho leh Erling Braut Haaland-ten record thar an siam a, an mikhual Union Berlin lakah Borussia Dortmund chu 5-0 ngawtin hnehna an chanpui. 

Sancho hian minute 13-na lekah goal hmahruai a khung a, kum 19 mi forward hi kum 20 tlin hmaa Bundesliga-a goal 25 khung tling thei hmasa ber a ni nghal. 

Dortmund tan striker thar Erling Braut Haaland chuan a vawi khat nan inkhel bul a ṭan a, goal hnih a khung lehnghal - Marco Reus-a penalty khung chu Haaland-a hlawhchhuah a ni bawk. 

Kum 19 mi striker hian a match hmasa pahnihah goal nga a khung nghal a, goal hnih a khung leh avangin Bundesliga-a match hmasa pathuma goal sarih khung thei hmasa ber a ni. 

Sancho chuan Belgian midfielder Axel Witsel khung tur a siamsak bawk a, Manchester City rawlthar hlui hian a league match hnuhnung pakuaah goal kua a khung a, assist vawi sarih a nei bawk. 

Bundesliga inkhel dangah Bayern Munich chuan 3-1 in Mainz 05 an hneh a, Robert Lewandowski leh Thomas Muller bakah Thiago Alcantara chuan solo goal ropui a khung - Mainz tana Jerry St Juste goal khungin awmzia a nei lo. 

RB Leipzig chuan 2-2 a Borussia Monchengladbach an inhnehtawkpui avangin pahnihnaah an tla a, Bayern hian hma an hruai leh ta thung.