Tlai dar 2:15-ah Electric Veng leh Chanmari FC rematch

Nexa Independence Day Celebration Football Tournament chu vawiin hian khelh ṭan a ni dawn a, group of death tia sawi theih group A an inlan hmasa dawn. Group A-ah hian MFA Super Cup champion Mizoram Police, finalist Chanmari FC, semifinalist Electric Veng leh I League club Aizawl FC te an awm.

MFA Super Cup khelh zawh taka inkhel hmuhnawm bera chhal theih chu semifinal-a Electric Veng leh Chanmari FC te inkhel a ni a, coach S. Malsawmtluanga hote penalty shootout-ah an vannei ta zawk. Team ṭha pahnih hi ni nga hnuah an inhmachhawn lehnghal dawn a, vawiin tlai dar 2:15 hian Lammualah Chanmari FC leh Electric Veng inkhel hmuh tur a awm ang.

Tun season-a mipui hmuh châk chu Mama hnuaia Chanmari FC khel a ni a, Mizo football legend tia sawi ṭhin hian coach zinkawng chu MFA Super Cup-ah ṭanin final thlenpui mah se penalty shootout-ah Police an hneh lo.

Coach Mama hnuaia Chanmari FC hmasawnna langsar tak chu player-te fitness a ṭha a, an che rang tel bawk. Super Cup aṭanga thlir chuan practice aṭanga che ṭha a thlang a, tawnhriat nei ṭha David Lalrinmuana te pawhin an sulhnu ṭha tak vangin khelhna hmun an chang bik lo.

Chanmari FC hi an squad a chhah ṭha a, Electric Veng an hmachhawn ṭumin right back Lalbiaknia Royte a khel ṭha tawk lo - tun ṭumah hian tawnhriat ngah zawk Thomas Lalengkima tan luhna hun ṭha a ni thei ang. Mama hote hi Electric Veng nen an intum hmasak ṭumin inkhelah an chungnung hret a, an chakna erawh penalty a ni.

I Day Football-ah chuan an inhnehtawk a nih chuan point khat ve ve pek an ni dawn.

Electric Vengin Chanmari FC an hneh loh zawhah keeper Lalmuansanga leh defender C. Lalnunmawia ten mittui nen khelmual an chhuahsan a, coach Lalsangzuala Hmar pawhin a club hlui Chanmari FC an hneh loh chu a pawm thiam lo.

Mizo coach thawkrim Sanga chuan, "An hnuaiah kan awm reng dawn lo," tiin Chanmari FC hnuaia awm reng tur an nih loh thu a sawi a, inpuahchahna hun rei lote an neih chhung hi an hmang ṭha em tih vawiin hian a hriat ang.

Electric Veng hian midfield-ah ball pet thiam Jacob Lalrawngbawla an kawl a, winger tlan chak Ramhlunchhunga chawm tur a nei a, tawnhriat nei ṭha Lalrammawia leh Lalruatfela Zote te an kawl avangin inkhel hmuhnawm lantir tur an ni hrim hrim.