Police hmaah Aizawl FC fiahna

Nexa Independence Day Celebration Football Tournament 2019 match hmasa ber chu vawiin chhun dar 12:00 hian Lammualah khelh ṭan a ni dawn. State pawn coach awmchhun Stanley Rozario kaihhruai Aizawl FC chuan player nei ṭha ber tia chhal ngam Mizoram Police an hmachhawn dawn.

Aizawl FC hian MFA Super Cup-ah entry fee pe thlap mah se inpuahchahna an la neih ṭhat tawk loh avangin an inhnukdawk a, chuti chu ni lo se I League club leh Mizoram Police inkhel hi quarterfinal-ah hmuh theih tur a ni. Tualchhung football ngainatu ṭhenkhat chuan Aizawl FC inhnuhdawh chhan hi Police an hmachhawn hma theih vang an ti a, tun ṭumah erawh I League club hi an inpeih tawh avangin inkhel hmuh tur a awm ngei dawn.

I League club Aizawl FC hian foreigner pahnih Alfred Kemah Jaryan leh Juuko Richard Kassaga te an kawl a, tawnhriat nei ṭha keeper Lalawmpuia, defender C. Lalrosanga leh Lalhriatrenga (Achia) bakah vanglai hmang mek Paul Ramfangzauva, Rochharzela, Isak Vanlalruatfela leh F. Lalremsanga te an la nei cheu.

Stanley Rozario hote hian bul ṭan tur player ṭha an kawl a, chutihrualin first team-ah rawlthar ṭha rual an dah chhoh avangin coach tan rem khawm dik a pawimawh khawp ang. An khingpui tur Mizoram Police erawh tawnhriat nei ṭha vek tia sawi theih an ni a, MFA Super Cup champion an ni tih hriat a ṭha bawk.