Khawvel defender manto ber Harry Maguire

Manchester United chuan Harry Maguire chungchangah Leicester City nen inremna an nei tawh a, England centre back hi pound maktaduai 80 man a nih dawn avangin khawvel defender manto ber a ni ang.

Nimin khan kum 26 mi Maguire hian medical test nei turin United training-na hmun Carrington a thleng a, he thuziak i chhiar meuh chuan United player a ni thei tawh bawk.

Manchester United-in season liam ta khan goal 54 an chhuah a, an hmelma Liverpool (22) aiin a let hnih chhuangin goal an chhuah tam. Ole Gunnar Solskjaer chuan central defender ṭha lakluh hi thupui berah a nei a, tunah chuan a duh a hlawhtling dawn ta.

United-in transfer inhawn ṭantirh aṭangin Harry Maguire an duh thu an tichiang nghal a, amaherawhchu Leicester City chhiarna zat erawh a tam hret a ni. Kar thum liam ta thleng khan United hian defender dang an melh pah reng a, transfer hun a tawp hnaih avang leh an duh ang an hmuh si loh avangin Maguire lakah sum an sen tam a ṭul ta a ni.

Chutihrualin Solskjaer hian Maguire a duh chhan hi an khelh dan chauh a ni lo a, tlarhnung aṭanga ball a sem theih bakah hruaitu nih tling a nihna chu a ngam huaina chhan a ni. United tlarhnung awm saah hian khelmual chhunga hruaitu nih tling an awm lo.

Football ṭhang zelah tlarhnung pawimawhna a lang a, goal khung thei striker man pha lo mah se defender man pawh a to ta. Liverpool-in January 2018 khan Virgil van Dijk chu pound maktaduai 75-in Southampton aṭangin an lalut a, Dutch defender hian Champions League a chawipui tawh avangin an lei tlawm tiin a sawi theih tawh zawk.

Bayern Munich pawhin pound maktaduai 68 zetin Atletico Madrid defender Lucas Hernandez chu tun July thlatir khan an lalut tawh a, Juventus pawhin Ajax aṭangin Matthijs de Ligt chu pound maktaduai 67.5 zetin an lalut. Season liam taa Manchester City-in Premier League an chawi theihna kawnga player pawimawh Aymeric Laporte pawh kha pound maktaduai 57 man zet a ni.

United-in an elpuite elpha turin Maguire manah sum an seng tam a, player hlutna san chakzia leh English defender statistics thlirin pound maktaduai 80 sen ve theihna tur a ni. Season thum chhunga an khelh dan thlir letin tehna hrang hrang minute khelh zat, tackles, boruaka ball inchuh, interception, goal leh assists-ah Maguire hian khawvel defender ṭha dang a elphak vek.

Manchester United hian tlarhnung laia khel thei player paruk Phil Jones, Chris Smalling, Marcos Rojo, Axel Tuanzebe, Victor Lindelof leh Eric Bailly te an kawl mek a, tu nge Maguire nen inkawp ang tih leh tu nge chhuak ang tih chu zawhna awm nghal a ni.

Solsjkjaer-a hote hian pre season friendly match hnuhnung berah Inrinni zan khan Principality Stadium-ah AC Milan chu 2-2 a an inhnehtawkpui hnuin penalty shootout-ah 5-4 in an chak. Hemi ṭum hian defence laiah Lindelof leh Rojo te an inkawp a, Premier League match hmasa bera Chelsea an hmachhawn hunah Maguire hian Argentine defender hi a thlak rin a ni a, London club nen an inhmachhawn hunah hian Rojo hian club dang  a zawm tawh hial mai thei.

Manchester United-in goalkeeper David de Gea leh midfielder pawimawh Paul Pogba an chelh dawn niin a lang a, player dang an lalut tawh lo a nih pawhin an lakluh chin Aaron Wan-Bissaka, Daniel James leh Maguire-ah hian United ṭantute an lungawi tawh ang.

Transfer-a an chet ṭhat belhchhah turin United hian pre season friendly match-ah an khingpui an hneh vek a, contract ziak thar Marcus Rashford-a'n AC Milan lakah goal ropui a khung. Premier League club tan transfer hun hi August 8 zan dar 9:30-ah a tawp dawn a, United hi Paulo Dybala, Mario Mandzukic leh Bruno Fernandes te nen sawi zawm an la ni reng bawk.