French Super Cup Rennes hnehtu PSG-in nomawi an chawi

Paris St-Germain chuan si an phurh hmasak zet hnuah Rennes chu 2-1 a hneh letin French Super Cup nomawi an chawi a, Ligue 1 champion hian ṭha takin season an khuh hawngah a ngaih theih.

Paris club hian tun hnai season sarih chhung zet chu a zawnin Super Cup an chawi ta a, tun hma lama vawi ruk lo champion zawn tawh Lyon (2002 - 2007) record ṭha tak chu an rawn khum chiah, an tlachhe thut a nih loh chuan record ropui zawk an siam chhunzawm a beiseiawm.

Kumin Super Cup hi Shenzhen Universiade Sports Centre Stadium, China-ah khelh a ni a, French Cup champion Rennes lam an chefuh hmasa zawk. Minute 13-na lekah Benjamin Bourigeaud-a cross chu vengtu nei lo midfielder Adrien Hunou-a'n goal hmahruai khung nan a hmang a ni.

Ligue 1 champion PSG hian hliam vangin Neymar an la chhawr thei lo a, Brazilian forward awm loh laia an thlamuanpui ber Kylian Mbappe bawk chu mamawh chhanna a ni leh. France international striker hian Pablo Sarabia hnen aṭanga a ball hmuh chu awlsam takin a khung.

Minute 73-naah PSG lamin freekick an hmu a, a pet turin Angel di Maria a rawn ding chhuak. Ander Herrera thlaka rawn lut Di Maria hian khelmualah minute 12 chauh hun a hmang hman tihin chakna goal pawimawh tak a khung a ni.

Tun hnaiah Edinson Cavani chhuak tur anga sawi thawm a tam a, mahse Uruguay international chuan Super Cup an khelh hma hian PSG chhuahsan tumna a neih loh thu a sawi chiang a, Rennes nen an intawn ṭum hian a khel tluan.

Inter Milan nena sawi zawm Cavani chuan, "PSG-ah hian 2020 June thla thleng daih contract ka nei a, chiang taka ka sawi duh chu ka contract neih lai hi ka hmang zo ang," a ti. Inter hian Romelu Lukaku lak an harsat avangin Cavani lam an hawi, an tum erawh a hlawhtling rih chuang lo.

Kum 32 mi Cavani hian Paris club-ah season sarih hun a hmang tling dawn tawh a, match 280 aṭanga goal 193 a khungsak tawh a, an club tana goal khung hnem ber record chelh mektu ni mah se Neymar awm hnuah 'number 1' a nihna a hloh a, rawlthar Mbappe a awm leh tak avangin a dinhmun a nghet lo niin an sawi fo.

Mahse, Cavani chuan, "Ka chanchin hi media lamin an rindan hmangin an sawi kual ṭhin tih ka hria, tun nipui bazar chhung hian eng club dang nen mah inbiakna kan nei lo. Contract zawh hnu lam chu ka sawi thei lo a, mahse tunah chuan hlim takin ka awm a ni," a ti.

Footballer manto ber Neymar chu Copa America khelh tura an inbuatsaihna lama a hliam a la dam lo a, hliam vang hian club training ni hmasa ber pawh a zawm lo. Club thuneitu lamin an forward hi chhuahtir an hreh lo nia sawi a awm, an phalna ang zata dawrtu erawh an la nei lo.

Super Cup an khelh ṭum hian Neymar chu inlan lo mah se a hmunah a en ve a, tun hnaiah a player puite ngeiin a tluk der (?) dan an zir lai social media lamah hmuh tur a awm avangin team chhungah a boruak a ṭha lutuk lo tih chu a hriat theih - chutih rualin inkhawm ngeih vanga tihdan inzirsak pawh an ni thei a, media lam chuan a ṭha lo zawngin an ngaihsak a ni.

Kum 27 mi Neymar hi a club hlui Barcelona lam chuan laklet an hreh lo niin an sawi. Amaherawhchu, Catalan club hian sum tam takin Antoine Griezmann chu Atletico Madrid aṭangin an la tawh a, a hmaa an hralhna ang zat chuan an lak let ngam a rinawm loh.